Wednesday, 23 November 2022

පලිඟු බෝලයෙන් පෙනෙන ඊළඟ කතාව



"රනිල් ජන මනස කියවාගෙන ඇත - බහුතරයක් ජනතාව රනිල් කියවාගෙන නැත"

මාස තුනකට පෙර මා කී අනාවැකි සනාථ වෙමින් පවතී. රනිල් යටතේ ටිකෙන් ටික රට යථා තත්වයට පත්වනවා යන මායාව බහුතරයක් ජනතාව වෙලාගෙන ඇත. උද්ඝෝෂණ, පෙළපාලි, වැඩ වර්ජන, වීථි සටන් පුස්සක් බවට පත්වෙමින් ඇත. සිංහල-බෞද්ධ අභිමානය යැයි කියාගෙන වසර 70ක් 80ක් ඔසවාගෙන ආ වික්ටෝරියානු සංස්කෘතියේ අංග එකින් එක ගලවා ඉන්දියන් සාගරයට විසිකිරීමට වැඩ සැලසෙමින් පවතී. ඉන්දු-ඇමරිකන් සහයෝගීතාවය සුමටව සහ සුවපහසු සහිතව ලංකාව නතු කරගනිමින් සිටියි. චීනය යන යකා කොරහත් බිඳගෙන යන තත්වයක් මතුවෙමින් ඇත. 

---------------------------------------

මේ බංකොලොත් හිඟන දීන තත්වයට පාර කැපුවේ රාජපක්ෂලා බව අවබෝධ කරගැනීමට තරම් බුද්ධියක් තවමත් බහුතරයක් රාජපක්ෂ ගැත්තන්ට පහළවී නැත. එම තත්වය රනිල් විසින් ඉතා සුක්ෂමව උත්ප්‍රේරණය කරන බව තේරුම් ගැනීමට තරම් බුද්ධියක් රනිල්වාදීන්ට නැත. 

ලංකාවේ බහුතරයක් ඉදිරියේ සිදුවන ව්‍යසන ඉවකරගැනීමට සමත් පිරිසක් නොවේ. ඒ වෙනුවට ඔවුන් ලැබෙනා ඉතා සුළු පහසුකමක් වෙනුවෙන් රටට හෙණ වැදුනත් කම් නැතැයි සිතන ජාතියකි. රනිල් මේ ජන විඥානය මැනවින් හඳුනා ගෙන ඇත.

---------------------------------------

ලංකාවේ නාගරික මධ්‍යම පංතිය නැගී සිටියේ ගැඹුරු පද්ධති-ප්‍රතිපත්ති වෙනසකට නොවන බව මගේ හැඟීමයි. ඔවුන් වියරු වැටුණේ තමන් ගතකල සුව පහසු දිවිපෙවෙත කඩා වැටුණු හෙයිනි. රනිල් මේ ජන මනස මැනවින් කළමනාකරණය කළේය. රට බංකොලොත් බව රජය ප්‍රකාශ කර ඇත. මේ අනුව දැන් ලංකාව සියළු ණය හිමියන්ට ණය හෝ පොලිය ගෙවීම අත් හිටුවා ඇත. මේ නිසා ඉතිරි වන මුදලින් ඉන්ධන, ගෑස්, සහ අත්‍යවශ්‍ය ආහාර ද්‍රව්‍ය සඳහා කෙසේ හෝ යාන්තමින් හිග පියවයි. මේ නිසා දැන් මධ්‍යම පංතියට අරගලය අමතකවී ඇත. සමහරුන්ට එය අරහං වී ඇත. 

නමුත් ගෙවෙනා සෑම පැයකම ලංකාව ගෙවිය යුතු ණය හා පොලිය වේගයෙන් ඉහල යයි. එක් අවස්ථාවකදී තව දුරටත් මේ ගමන යා නොහැකිව රට සමාජ ව්‍යසනයකට ඇද වැටෙයි. ලංකාව සතු වත්කම් විකිණීමෙන් මේ ලක්ෂයට ලඟා වීම යම් තරමකට පමා කරගත හැක. ලාංකිකයා දිය සැලිය නටන තෙක් එහි කෙලින කකුළුවා වැනි බව රනිල් දනී. 

"විකිණිය යුත්තේ ලාභ ලබන ආයතනයි" ඔහු දැන් හඬ නගා පාර්ලිමේන්තුවේදීම පවසයි. ජනතාව මීක් නැත. මන්ද දැන් ඔවුන්ට යාන්තම් ඉන්ධන බින්දුවක්, ගෑස් සිලින්ඩරයක්, ආහාර ටිකක් අහස උසට මුදල් ගෙවා හෝ මිලදී ගත හැක. 

"නැවතත් අරගලයක් පැමිණිය හොත් හදිසි නීතිය දමා, හමුදාව යොදවා එය මර්දනය කරනවා" නැවතත් ඔහු කියන්නේ පාර්ලිමේන්තු ගැබ දෙවනත් කරමිනි. සමහර මිනිසුන් මෙයට හුරේ දමා පෝස්ට් පලකරනු දුටුවෙමි. ඔවුන්ට දැන් අරගලය කරදරයකි. අරගලය ඇරඹුණේ කුමන කාරණයක් පාදක වීමෙන්ද කියාවත් ඔවුන්ට මතකයක් නැත. මේ පහල මධ්‍යම පන්තියේ ඛේදවාචකයයි. 

මෙතෙක් කිසිම ජනාධිපතිවරයෙක් විවෘතව පැවසීමට මැලි වූ ඉහත කරුණු ඔහු දැන් නිබයව පවසයි. ලංකාවේ බහුතරයක් දීන මනසින් යුතු බව ඔහු කියවාගෙන ඇත. 

ඉදිරියේදී සියල්ල විකුණා අවසන් වුවත් ජනතාවගේ බඩගින්න නිවීම අපහසු බව රනිල් දනී. එවිට සුළුතරයක් ඔහුට එරෙහිව නැගී සිටියහොත් කල යුතු දෙයට ඔහු සුදානම් වෙයි. එවිට බහුතරයක් දීන මනස් ඔහු සමග සිටින බවටද ඔහු වග බලා ගනී. 

-----------------------------------------

ඊළඟ චන්දය හෝ චන්ද පෙළ ජවිපෙ ප්‍රමුඛ ජාතික ජන බලවේගය විශිෂ්ඨ ආකාරයෙන් ජයග්‍රහණය කරන බව මගේ හැඟීමයි. ඒ ජවිපෙ ප්‍රතිපත්ති හෝ ඉදිරි වැඩපිළිවෙල සලකා නොවේ. ඔවුන් මේ වන විට දියත්කර ඇති ක්‍රියාන්විතය සලකා බලාය. ලංකාවේ සියළුම පක්ෂ අභ්‍යන්තර ගැටළු විසඳ ගැනීමට එකිනෙකා කුළල් කාගන්නා අතර ජවිපෙ ඉතා සුමටව මහජනතාව දැනුවත් කරමින් සිටියි. මෙය මේ අවස්ථාවට උචිතම ක්‍රියාන්විතයයි. මැතිවරණයක් පැමිණෙද්දී ඔවුන් පැහැදිලිවම අනෙක් පක්ෂවලට වඩා ඉදිරියෙන් සිටිනු ඇත. අභියෝගය වන්නේ ඇත්තෙන්ම චන්ද දිනීම නොව ඊට පසු කරන්නේ කුමක්ද යන්නයි. 

අනෙකුත් විකල්ප බලවේගවලටද තවමත් කාලය ඇත. ඔවුන් ජවිපෙන් ස්වායත්තව තම මැතිවරණ ව්‍යාපාරය ඉදිරියට ගෙන යාමේ කිසිඳු වරදක් නැත. සිදුවිය හැකි හොඳම දේ ජාතික ජන බලවේගය සහ ප්‍රගතිශීලි විකල්ප කණ්ඩායමක් අතර මූලික ගැටුම ඇතිවීමයි. අසූචි ආයුධ ලෙස භාවිතා කරන විමල් වීරවංශ සහ හරීන් ප්‍රනාන්දුගේ වාදයක් වෙනුවට ප්‍රතිපත්ති  සහ වැඩපිළිවෙලවල් ආයුධ කරගත් චතුරංග අබේසිංහගේ සහ පැතුම් කර්නර්ගේ සටනක් බැලීමට මම පෙරුම් පුරමි. 




     

Thursday, 17 November 2022

අපි නිර්මාණිලාව තනි නොකරමු



මියගිය නිර්මාණි ජිවත් වූ නිර්මාණිට වඩා බලවත් බව කවුදෝ මගේ FB පිටුවේ සඳහන් කර තිබුණි. එය සැබෑවකි. ජිවත් වුවත් මළකඳන් වැනි මිනිසුන් අතර මියගිය පසු තවත් උස් හඬින් හදවත් අමතමින් යුග පෙරලි කරන චරිතද කලාතුරකින් දැකිය හැක. 

නිර්මාණිගේ මරණයට පසු අපට දැක ගන්නට ලැබුණේ ඇයගේ දර්ශණයට ඉඳුරාම පටහැනි හෘද සාක්ෂියක් ඇති එවුන්ගේ මානසික කම්පනයයි. නොඑසේ නම්, වැරදි තීරණ ගෙන, ඒවා සාධාරණීකරණය කරමින්, ඒවා පාරාවළලු වෙමින් පැමිණෙන විට ඉන් මිදීමට පඹ ගාල් අතර දුවමින්, ඒවායේ පැටලෙමින්, පණ අදින සමහරුන්ගේ විලාපයයි. 

මිසරය, ග්‍රීසිය, රෝමය, චීන මින්ග් අධිරාජ්‍යය ආදී දැවැත්ත ශිෂ්ඨාචාර ඒවායේ අවසානයට ලඟා වන විට තිබූ සමාජ හැසිරීම් රටාවල ඉතා කිට්ටු සමානකම් ඇත. ඓතිහාසික මුලාශ්‍ර විශ්ලේෂණය කිරීමේදී පෙනී යන්නේ මේ ශිෂ්ඨාචාර කෙලවරට පැමිණෙන විට සමාජය අතිශයින් විෂමාචාර තත්වයකට පත්වී ඇති බවයි. සමහර විට සමාජය ඒ තත්වයට පත්වුන නිසා ශිෂ්ඨාචාරය විනාශ වුවාද විය හැක. 

පාලක ස්ථරය සහ ඔවුන් අවට සිටි ප්‍රභූ පැලැන්තිය අසීමාන්තිකව ධනය සහ බලය හඹා යමින් බහුතර ජනයා පෙලන්න විය. ඔවුන්ගේ ජරා ජීර්ණ ජිවිත ක්‍රියාවලිය සහ තාඩන පීඩන හමුවේ ජනතාව නැගී සිටීම යම් තරමකට පමා කලේ ආගම පලිහක් ලෙස යොදාගත් පූජක පන්තියයි. ඔවුහු පාලකයාට දේවත්වයක් ආරෝපණය කරමින් සහ නොයෙකුත් අළුත් මිත්‍යා මතවාද වපුරමින් ජනතාව භීතියට පත්කළහ. මේ වෙනුවෙන් ඔවුන්ට බොහෝ යස ඉසුරු පාලක පැලැන්තියෙන් ලැබුණි. ඔවුන්ගේ මතවාද වැපිරීමට සමාජය තුලම සුළුතර පිරිසක් විය. ඔවුන් බොහෝ දෙනෙක් බුද්ධි හීන අඳබාලයන් විය. ඔවුන්ව මිත්‍යා මතවාද තුලින් බියවැද්දීම පහසු විය. අනෙක් පිරිස පූජකයන්ගෙන් යම් යම් ලාබ ලැබූ අධම තක්කඩියන් විය. ඔවුන් දෙපිරිසම පුජකයන් සහ පාලකයන් වෙනුවෙන් ජනතාව මිත්‍යාවේ වලලා තැබීමට උපරිම උත්සහයක් දැරීය. අවසානයේදී සියළුම දෙනා සමගින් මේ ශිෂ්ඨාචාර වැනසී ගියෝය. 

ඒ දැවැත්ත සමාජ පද්ධතිවලට අලඟු තියන්නවත් නොහැකි ලංකාව, අද පත්ව ඇත්තේ තවත් කුඩා කෙටි කාලීන ශිෂ්ඨාචාරයක අවසානයට බව මට හැඟෙයි. 

පසුගිය දොළොස් වසරක පමණ කාලය තුලදී බුදු දහම සහ සිංහල සංස්කෘතිය රාජපක්ෂ දේශපාලනය සමග සාර්ථකව පූට්ටු කිරීමට රාජපක්ෂලා වටා සිටි හෙංචයියන් සමත්විය. මොවුන් අතර දේශපාලකයන්, කලාකරුවන්, මාධ්‍යවේදීන් මෙන්ම ඉහල පෙලේ වෘත්තිකයන්ද සිටියෝය. මෙම පූට්ටුව ජනගත කිරීමට රාජපක්ෂලාගේ සොරකම් මත යැපුණු මාධ්‍ය ජාලයන් කිහිපයක්ම විය. එහි උච්චතම අවස්ථාව එළැඹෙන්නේ 2019 ජනාධිපතිවරණය සමයේය. නාග ධාතු, වලින් ඇරඹුන ගමන සාරි අන්දන බෝගස් සහ චෛත්‍ය, රහතන්වහන්සේලා, බුදුවරුන්, මුක්කුන්වහන්සේලා, සඳ කුමරුන්, ප්‍රියමාලිලා හරහා දැන් කිරුළු පලන් දියසේන දක්වා පැමිණ ඇත. මේ ගමන මෙතෙකින් නතරවන්නේ නැත. මෙය දැන් බෝවෙන ලෙඩක් තරමට උත්සන්න වී දේව බලයෙන් ෆෝන් චාර්ජ් කරන, ක්‍රීඩා තරඟ දිනවන පාෂ්ටර්ලාද බිහිවෙමින් පවතී. කාඩිනල්වරයා පවා මේ තත්වය ඇති කිරීමට මුලදී සෑහෙන සහයෝගයක් දුන්නේය. 

මෙලෙස පිස්සන්, තක්කඩියන්, සොරදෙටුවන් පසු පස සාදු කියමින් යාමට ඕනෑම අයෙකුට අයිතියක් ඇති බව කෙනෙකුට තර්ක කල හැක. එහෙත් එහි ප්‍රතිඵලය අත් විඳීමට සිදුවන්නේ මුළු සමාජයටම බව අප අමතක කල යුතු නැත. දැන් දැන් සාදුන්වහන්සේලා කාන්තාවන්ගේ ඇඳුම, පාසැල් දරුවාගේ ලිංගික අධ්‍යාපනය, පවුලක දරුවන් ගණන තීරණය කිරීම පමණක් නොව අඹු සැමි යුවලක් සයනයේදී කටයුතු කල යුතු ආකාරය ගැනද අණ සහ උපදෙස් දීමට ඉදිරිපත්වී ඇත. 

අබුද්ධික, නිවට, නොන්ජල් බහුතරයක් සිටින සමාජයක සිතන්නට හැකි පුළුල් මනසක් ඇති සුළුතරය අසරණ වෙයි. ඔවුන්ට එවිට ගත හැකි ක්‍රියාමාර්ග ඇත්තේ දෙකකි. එකක් නම් රට හැර යාමයි. එයින් සමාජ පද්ධතියේ කඩා වැටීම තවත් ඉක්මන් කරයි. දෙවැන්න බහුතරයක් අබුද්ධිමත් ප්‍රජාව දැනුවත් කර ඔවුන් නැවතත් ප්‍රකෘති සිහියට ගැනීමයි. මෙය කිරීමට ගිය විගසින් මෙම අබුද්ධික බහුතරය මෙලෝ තේරුමක්  නැති ඉතා අමනෝඥ සහ විකටරූපී තර්ක නගමින් අපහාස අවලාද කිරීමට පටන් ගනියි. ඔවුන් මිත්‍යාවට එරෙහිවන්නාට බුදු දහමට ගරහනවා යයි කියමින් වෛර කරන්නේ ඇත්තටම බුදු දහම පිළිබඳව හැඟීමකින් නොව ඔවුන් බුදු දහම හා පූට්ටු කල තම දේශපාලන පක්ෂය බිඳ වැටේ යයි ඇති බිය නිසාය. බොහෝ දෙනෙකු මෙය අවිඥානිකව සිදු කරයි. 

මා දකින ආකාරයට මෙහි ඊළඟ පියවර බෞද්ධ-තලේබාන් රාජ්‍යයකි. නිර්මාණිලා වෙහෙස වුයේ මේ ගමන නැවත්වීමට යයි මට සිතෙයි. 

අපි නිර්මාණිලාව තනි නොකරමු. එසේ නොමැති නම් හැකි සියලු දෙනාම රටින් පිට වී ගිලෙන නැව දෙස බලා සිටිමු. 



Wednesday, 2 November 2022

කල යුත්තේ කුමක්ද? මට හිතෙන හැටි



දිගු ලිපියක් ලිවීමට කල් ගතවන බැවින් කෙටියෙන් කියමි.

ඔබට වසන්ත ඇතුළු වද බන්ධනයට ලක්වන පිරිස මුදා ගැනීමේ අවංක චේතනාවක් ඇත්නම් ජූලි චංග්, IMF/WB නියෝජිතයන් සහ බටහිර, ජපානය, ඉන්දියාව ඇතුළු  හැකි සෑම රටකම තානාපතිවරුන් හමු වී සාකච්චා කරන්න. ඒ පිළිබඳව ජාත්‍යන්තර මාධ්‍ය දැනුවත් කරන්න. හැකි සෑම අවස්ථාවකම ලැබෙන තීන්දු පිළිබඳව නොසිතා නීතිය හමුවට ඔබේ දුක් ගැනවිලි ගෙන යන්න. ඒ ගැන අන්තර්ජාතික මාධ්‍ය අමතන්න.

ඔබට රටේ සිස්ටම් චේන්ජ් එකක් අවශ්‍ය නම් අඩුම තරමින් සිතන්න හැකි බුද්ධියක් හා යම් තර්ක ඥානයක් තිබෙන පිරිස්වත් හැකිතාක් එකතුවන්න. ඔබේ මතවාදීමය හෝ න්‍යායාත්මක වෙනස්කම් ටික කලකට ලාච්චුවට දමා වසන්න. චන්දයක් පැමිණෙන තෙක් හැකි සෑම අයුරකින්ම සිදුවූ සහ සිදුවන දුෂණය, භිෂණය, වංචාව, තක්කඩිකම් ගැන ජනතාව දැනුවත් කරන්න. මේ සඳහා සමාජ මාධ්‍ය, කුඩා රැස්වීම්, සමූහ සාද, මාධ්‍ය සාකච්චා, කලා වේදිකාව ආදිය පමණක් නොව කඩමණ්ඩිය, කන්තෝරුවේ කෑම පැය, පොදු ප්‍රවාහන භාවිත කරන අවස්ථාව, මංගල-අවමංගල උත්සව, බණ ගෙදර, දානේ ගෙදර ආදී සමාජය හමුවන සෑම අවස්ථාවක්ම යොදාගන්න.  

රටේ උන්නතිය සඳහා අවධානය යොමු කල යුතු වැදගත්ම අංග 12 ක් හෝ 15 ක් අර්ථ දක්වා ගන්න (අධ්‍යාපනය, සෞඛ්‍ය, ප්‍රවාහනය, සන්නිවේදන ක්‍රමවේද, පර්යේෂණ සහ නව නිපැයුම්, කෘෂිකර්මය සහ වාරි කර්මය, පරසර සංරක්ෂණය ආදී). ඉන් පසු එම අංශ දියුණු කිරීමේ මාර්ග පිළිබඳව සංවාදයක් ගොඩනගන්න. රටේ මේ වන විට ඉතා දරුණු තත්වයකට පත්ව ඇති ඍණාත්මක මනෝභාවයන් වෙනස් කිරීමට මෙය බෙහෙවින් ඉවහල් වනු ඇත.

මම නැවතත් කියමි. සාම්ප්‍රදායික උද්ඝෝෂණ නැවත නැවතත් කිරීම තුලින් අරගලය දිනා දුන් බොහෝ දේ ඔබට නැවතත් අහිමි වනු ඇත. මිනිසුන් වේගයෙන් අරගල බිමින් ඈත්වෙමින් පවතී. ඒ බව ඔබට සමාජ වටපිටාව තුලින් නිරීක්ෂණය කල හැකිය. එදා ගෝල්ෆේස් එකට පැමිණ ඔබ වෙනුවෙන් මැරයන්ට පහර දුන් ජනතාවම ඊළඟ උද්ඝෝෂණයේදී ඔබට පහරදීමට හැක. 

රනිල් ලාංකීය ජන මනස හැසිරෙන ආකාරය කියවා ඇත. නමුත් සමාජයේ බොහෝ  දෙනෙක් රනිල්ව කියවා නැත. 

Friday, 28 October 2022

ආචාර්ය උපාධිය වෙනස් සෙල්ලමකි


සමාජ මාධ්‍ය තුලින් මා හඳුනාගත් ලංකාවේ තරුණ උපාධිධාරියෙක් ඊයේ මා අමතා උපකාරයක් ඉල්ලීය. ඒ මා මැලේසියාවේ කලින් සේවය කල සරසවියේ PhD උපාධිය සඳහා අයැදුම් කිරීමේදී ඇතිවූ ගැටළුවක් පිලිබඳවය. එම සරසවියේ විද්‍යුත් ඉංජිනේරු ආචාර්‍ය උපාධියට ලියාපදිංචි වීමට නම් විද්‍යුත් ඉංජිනේරු හෝ භෞතික විද්‍යා විශේෂවේදී උපාධියක් සෑහෙන ඉහල CGPA අගයක් සමග ලබාගෙන තිබිය යුතුය (මෙම සරසවියේ QS ලෝක ශ්‍රේණිගත කිරීම 123 වේ). මා ඇමතු උපාධිධාරියාට එම සුදුසුකම් තිබුණේ නැත. 

ප්‍රතිපත්තියක් ලෙස මා එවැනි අවස්ථාවලට මැදිහත් නොවන බව මම ඔහුට කාරුණිකව පැවසුවෙමි. ඔහු ඉන්පසු මා සමග වචනයක්වත් කතා කලේ නැත. මගේ තීරණයට හේතු පාදක වූ අතීත කතාව ඔහු වෙනුවෙන් මම මෙසේ ලියා තබමි.

------------------------------------------

මීට වසර 10 ට පමණ පෙර මම මේ උපකාරය තවත් ලාංකිකයෙකුට කලෙමි. අවශ්‍ය උපාධි පථය ඔහුට නොතිබූ අතර ඔහුගේ CGPA අගය අවශ්‍ය අවමයට වඩා ඉතා පහලින් විය. සාමාන්‍යයෙන් අධීක්ෂකවරයාට (supervisor) යම් පශ්චාත් උපාධි (විශේෂයෙන් PhD) අයදුම්කරුවෙකුගේ සුවිශේෂී දක්ෂතා ඇති බව හැඟේ නම් ඔහු හෝ ඇය වෙනුවෙන් විශේෂ සලකා බැලීමක් සඳහා පශ්චාත් උපාධි කමිටුවට මැදිහත්විය හැක. නමුත් මෙහිදී තමා අයදුම්කරුගේ දක්ෂතාවය පිළිබඳව වගකියන බව අධීක්ෂක මහාචාර්යවරයා විසින් ලිඛිතව දැනුම් දිය යුතුය. මේ අයදුම්කරු ලාංකිකයෙකු වන බැවින්ද, තිබූ දැන හැදුනුම්කම් වෙනුවෙන්ද, ඔහු MSc දෙකක්ම කර තිබූ නිසාද මම ඔහු වෙනුවෙන් මැදිහත් වුනෙමි. 

නමුත් ටික කලකින්ම මට වැටහුණේ ඔහු ආචාර්‍ය උපාධි භුතාර්ථයක් (PhD entity) නොවන බවයි. කෙනෙකුට ශාස්ත්‍රපති (MSc/MA /MBA) උපාධි දහයක් ගත හැකි වුවත් එය PhD උපාධියක් කරා යාමට ඔහුට/ඇයට හැකි බව පවසන්නේ නැත. එය වෙනමම කලාවකි. කැපවීම සහ දැරීමේ හැකියාව, විශ්ලේෂණ ශක්තිය, විෂය පිළිබඳව ඉතා ගැඹුරින් මුලික දැනුම තිබීම ආදී කාරණා රාශියක් ඊට බලපායි. CGPA හෝ GPA අගය මේ හැකියාව මැන බැලීමේ සුදුසුම පරාමිතිය නොවුවත් එය ඒ සඳහා ඉහල දායකත්වයක් දක්වයි.

මෙම පුද්ගලයාට ඔහුගේ අඩු පාඩු  නොහැඟෙන ආකාරයෙන්, කල යුතු දේ කියා දීමටත් ඔහු වෙනුවෙන් පත්‍රිකා පවා සකස් කරදීමටත් මම උත්සුක වුනෙමි. නමුත් වසර තුනක් පමණ මගෙත් ඔහුගේත් කාලය අපතේ යැවීමෙන් පසු ඔහු කිසිවෙකුටත් නොකියාම ලංකාවේ සරසවියක PhD උපාධියට ලියාපදිංචි වූ බවත් මැලේසියාවේ සරසවියේ කටයුතු අතහරින බවත් එකවරම මට දැනුම් දුන්නේය. මේ සිදුවීමට දැන් වසර හතක් පමණ ගතවී ඇත. මා දන්නා තරමින් ඔහු මෙතෙක් තම අධ්‍යන කටයුතු පැත්තෙන් කිසිඳු ප්‍රගතියක් අත්කරගෙන නැත. අනවශ්‍ය ලෙස මුදල් වියදම් කිරීම සහ ජිවිතයේ විශාල කාලයක් නාස්ති කරගැනීම පමණක් සිදුවී ඇත. 

පසු කලෙක මම මේ තත්වය තවත් (මා යටතේ නොවන) සිසුන් රාශියක් තුලින් දැක ඇත්තෙමි. මම මුලින්ම මේ තැනැත්තාට ඔහුගේ අඩු CGPA අගය පෙන්වා ඔහුගේ නොහැකියාව කියා දුන්නා නම් ඔහුගේ මුදල් සහ කාලයත් මගේ කාලය සහ මැලේසියාවේ සරසවියේදී මා පත්වූ අපහසුතාවයත් නොවන්න තිබුණි. ඔහු මට ඉතා වැදගත් පාඩමක් කියා දුන්නේය. 


නව-ශිෂ්ඨාචාරකරණය



සුද්දා අප්‍රිකාවට පැමිණෙන විට එහි සිටියේ ගෝත්‍රවලට බෙදුණු මානව සමුහ ගණනාවකි. මේ සෑම ගෝත්‍රයකටම තමන් විසින් අර්ථ දක්වා ගත් දෙවියෙකු හෝ දෙවිවිවරු විය. සමුහයේ ආරක්ෂාව, රැකවරණය සහ අභිවෘද්ධිය මේ දෙවියාගේ කාර්යභාරය විය. මෙම ගෝත්‍රිකයන් අතර භූමිය සහ සම්පත් අරඹයා නිතර කළහ  ඇතිවිය. ඒ ගැටුම්වලදී දෙවියාට ඉහල මූලිකත්වයක් හිමිවිය.

අප්‍රිකාවට මුලින්ම සුද්දා පැමිණෙන කාලයේ යුරෝපයේ සමාජ හැසිරීම අප්‍රිකානු සමුහයන්ට වඩා වැඩි වෙනසක් නොවීය. ඔවුන්ටද මැද පෙරදිගින් ආනයනය කර තමන්ට රිසි පරිදි අර්ථ දක්වා ගත් දෙවියෙක් විය. මේ දෙවියා අප්‍රිකානු දෙවිවරුන්ට වඩා තත්වයෙන් ඉහල බව ඔවුන් උපකල්පනය කළහ. මේ සඳහා ඔවුන්ට තුවක්කු සහ වෙඩි බෙහෙත් උපකාරී විය. 

මේ අනුව තමන් දෙවියන්ගේ නාමයෙන් කරන මිනීමැරුම් සහ භූමි මංකොල්ලය අප්‍රිකානුවන්ගේ ගෝත්‍ර අතර කෙරෙන සටන් වලට වඩා ශ්‍රේෂ්ඨ සහ ශිෂ්ඨ සම්පන්න බව යුරෝපියයා නිගමනය කළේය. නග්නව හෝ සතුන්ගේ සම් පෙරවාගෙන, නොයෙකුත් දේව සහ මළගිය භූතාර්ථ යදිමින්, දඩයමෙන් ජීවිකාව ගතකල අප්‍රිකානුවන් "ශිෂ්ඨසම්පන්න" කිරීම තම පරම යුතුකම සහ අයිතිය බවට සුද්දා ස්වයං-තීරණයකට එළඹියේය. එතැන් සිට ගතවූ ශතක කිහිපය තුල "ශිෂ්ඨාචාරකරණයේ" නාමයෙන් යුරෝපියයා මානව ඉතිහාසයේ මෙතෙක් හමුවන ම්ලේච්ඡතම, කෲරතරම සහ අශිලාචාරාම ක්‍රියාන්විතය මෙහෙයවීය. මේ ශිෂ්ඨාචාරකරණයේ මූලික අරමුණ වුයේ භූමිය සහ සම්පත් මංකොල්ලය බව අද කුඩා දරුවෙකුට වුනත් පැහැදිලිය.

වසර දෙතුන් සියයකට පසු අද .....! භූමි-සම්පත් මංකොල්ලය එලෙසමය. ක්‍රමවේදය වෙනස්ය. එදා ශිෂ්ඨාචාරකරණය අද නව-ශිෂ්ඨාචාරකරණය (neo-civilizing) ලෙස කරලියට පැමිණ ඇත. 

බටහිර ලෝකය පසුගිය දශක කිහිපයක සිට නව-ශිෂ්ඨාචාරකරණය ක්‍රියාවේ යොදවයි. නමුත් මෙය ඉතා උද්වේගකර ත්වරණයකට භාජනය වන්නේ මීට වසර 15 කට පමණ පෙර සිටය. ඒ චීනයේ ජාත්‍යන්තර හැසිරීමට සමගාමීවය. 

දීර්ඝ කාලීනව ඌන සංවර්ධිත තත්වයේ පවතින රටවල් අති බහුතරයක දුෂණය, සොරකම, වංචාව, භීෂණය සහ නීතියේ ආධිපත්‍ය අස්ථාවර වීම සුලබව දකින්නට ලැබෙන තත්වයකි. මෙයට දේශපාලුවා ප්‍රමුඛ රාජ්‍ය සේවකයන්, ව්‍යාපාරිකයන්  ඇතුළු රටේ බහුතරයක් ජනතාවම වග කිව යුතු වෙයි. මෙම තත්වයෙන් එම රටවල් මුදා ගැනීම තම පරම යුතුකම සහ අයිතිය බවට බටහිර ලෝකය සිතයි. ඒ සඳහා ඔවුන් අද තුවක්කුව, කඩුව සහ කසය වෙනුවට ආර්ථික සම්බාධක, ණය සහ ආධාර, මාධ්‍ය සහ නොයෙකුත් ජාත්‍යන්තර ආයතන මෙන්ම ජාත්‍යන්තර අධිකරණයද යොදා ගනී. සමහර අවස්ථාවල පරණ පුරුදු ක්‍රමයට දෙවියන්වද නව-ශිෂ්ඨාචාරකරණය උදෙසා යොදාගන්න අවස්ථා නැත්තේම නැත. නව-ශිෂ්ඨාචාරකරණය කල රටක් තමන්ට නතුකරගැනීම වඩාත් පහසු බව ඔවුන්ගේ විශ්වාසයයි.

චීනය අවශ්‍ය රටවල් තමන් නතු කරගන්නේ ඉහත සඳහන් කල ක්‍රමවේදයට ප්‍රතිවිරුද්ධ ආකාරයටයි. ඔවුන් රටක් හැකිතාක් දුෂණයට යොමු කරයි. එය සියළු දේශපාලන පක්ෂ, රාජ්‍ය තන්ත්‍රය සහ ව්‍යාපාරික ප්‍රජාව දක්වා ව්‍යාප්ත කරයි. ඔවුන් මෙය සිදුකරන ආකාරය පිළිබඳව අප නොයෙක් වර සාකච්චා කර ඇත.

උගන්ඩාව, සැම්බියාව, කෙන්යාව, පකිස්ථානය, ශ්‍රී ලංකාව, වැනිසියුලාව, ඉක්වදෝරය, පේරු: මේ චීන ණය මත වසර දහයක් පමණ ගමන් කල රටවල්ය. ඒ සියල්ලටම පොදු වූ කාරණයක් ඇත. එනම් එම රටවල දුෂණය, භිෂණය සහ වංචාව උස්මුරුත්තාවට ගොස් තිබීමයි. ඔවුන් නහයෙන් ඉහලට වතුර ගලන මට්ටමට පත්වී ඇත. 

වරක් මා සේවය කරන සරසවියට පැමිණි කැනේඩියානු මහාචාර්යවරයෙක් අපූරු කතාවක් කීය.

"යුරෝපියයා වෙනුවට චීනා අප්‍රිකාවට පැමිණියා නම්, තවමත් අප්‍රිකානුවන් ගෝත්‍ර වලට බෙදී සැතපුම් ගණන් ගැඹුරු පතල්වල එකිනෙකා මරාගනිමින් ජීවත් වනු ඇත". 

මෙතැන් සිට කතාව (ලංකාව දෙසට) ඊළඟ ලිපියෙන් ලියන්නම්.  


කල යුතු දේ සාකච්චා කරන්න පෙර - සිදු වූ දේ ගැන මතකය අවදි කරමු.



අරගලය සමච්චලයට ලක් කරන පිරිස් පිළිබඳව මට ඇත්තේ දැඩි අනුකම්පාවකි. අරගලයේ යහපත් ඵල බොහෝය. ඒවා කාටත් නොදැනීම දිනපතා ලැබෙමින් පවතී. අරගලයට සමච්චල් කරන්නන්ටද එම යහ ඵල භුක්ති විඳීමට ලැබෙන බව ඔවුන්ට නොතේරෙයි. දැන් ජනතාව අඩසියවසකට පසු හෙමින් හෙමින් නිදි ගැට හරිමින් සිටියි. නීතිපති දෙපාර්තමේන්තුව ඇතුළු රජයේ ආයතන රැසක කටයුතු ඉතා සෙමෙන් වුවත් දේශපාලුවාගේ ග්‍රහණයෙන් මිදෙමින් පවතී. වෙනදා ජනතාව ඉදිරියේ මහා බලසම්පන්නව පෙනී සිටින දේශපාළුවා අද පන්සලක පිංකමකට යාමටද දෙවරක් සිතයි. ඔවුන් සෑහෙන  තරමකට ජනතාවට බිය වී ඇති සෙයකි. තක්කඩි රාජපක්ෂලාගේ බලය ක්‍රමයෙන් වියැකී යයි. ජෝන්ස්ටන්ලාගේ, රෝහිතලාගේ, මහින්දානන්දලාගේ කටවල්වලට යම් තරමකට ඉබි යතුරු වැටී ඇත. තවමත් දොඩවන්නේ මොලේ කලඳක් නැති තිස්ස කුට්ටිලා, සනත් නිශාන්තලා වැනි අමනයන් අතලොස්සකි. 

අරගලකරුවන් නිසා රටේ ආර්ථිකය බිඳ වැටුණු බව කියමින් පෝස්ට් පලකිරීමට තරම් මුග්ධ අඥාන වූ අතලොස්සක්ද සිටීම ඛේදජනකය. අරගලය ඇරඹෙන්නේ එවන විටත් කඩා වැටී හොම්බෙන් ගොස් තිබු ආර්ථිකයට වගකිව යුතු වූ තක්කඩි දේශපාළුවාට එරෙහිව බව තේරුම් ගන්න තරම් ඔවුන්ට බුද්ධියක් නැත. 

ජන අරගලය පාලක පක්ෂයට පමණක් නොව විපක්ෂයටද දැඩි අභියෝගයක් එල්ල කළේය. තමන්ගේ සහයෝගයෙන් තොරව ලංකාවේ ජන පිබිදීමක් සිදුවිය නොහැකි බව ප්‍රධාන විපක්ෂ දෙකම සිතා සිටි බව මගේ හැඟීමයි. අරගලය පිළිබඳව ඔවුන් ආරම්බයේදී කල ඍණාත්මක ප්‍රකාශන එයට සාක්ෂි දරයි. කිසිම විටෙක අරගලයේ නායකත්වය ගැනීමට ඉදිරිපත් නොවූ විපක්ෂය දිගින් දිගටම "හරි ගියොත් අපේ, වැරදුනොත් තොපේ" mode එකේ සිටියේය. මෙය අදටත් ඔවුන්ට දැඩි අවාසියක් ගෙන දෙයි.

Saturday, 22 October 2022

ආගමික, නිරාගමික සහ පෙට්ටියෙන් එළියට


"අහන්න ඔබගෙන්ම ඒ ඇයි කියා".

මා ආචාර්ය උපාධිය සඳහා පර්යේෂකයෙකු අධීක්ෂණය කරන විට ඔහුට හෝ ඇයට නිතරම දෙන මාර්ගෝපදේශයයි ඒ. 

ඉතා පුළුල් පරාසයක ජාති, ආගම් සහ සමාජ ස්ථර හරහා පැමිණෙන සිසු සිසුවියන් රාශියක් අධීක්ෂණය කර ඇති මට මේ උපදේශය ක්‍රියාවේ යෙදවීමට බියවන බොහෝ අය හමු වී ඇත. ඔවුන්ගේ ආගමික පසුබිම තුල මේ පැනය කිසි විටෙක තමාගෙන් ඇසීමට නොහැකිවන සේ කටට ඉබි යතුරු දමා ඇත.

ඔවුන් පමණක් නොව මාද කුඩා කල පටන් මේ වාරණයට ලක් වුවෙක්මි. මට කුඩා සන්ධියේ අප පවුල නඩයක් සමග කතරගම වන්දනාවේ ගියා මතකය. වැඩිහිටි කන්ද නගිද්දී හොඳටම හන්ටර් වූ මම "ඇයි අම්මේ මේ දෙයියෝ අර පහල දේවාලේ ඉන්නේ නැතුව කන්දක් උඩ ඉන්නේ. අපෙත් කකුල් කැඩෙනවා දෙයියෝ බලන්න ගිහින්" කීවෙමි.

මගේ මවටත් පෙර පුළුවන් තරම් ඇස් ලොකු කරගනිමින් මා දෙස බැලූ පුංචි අම්මා "අපෝ මේකාගේ කට. කොහේ ගියත් මේ වක්කඩේ වහගෙන ඉන්න බැහැ. මේක දෙවියන්ගේ අඩවිය කියල මේ කොල්ලට වගක් නැහැ නෙව". 

කොහොමත් ඒ කාලයේ පාසලේදී මගේ රෙකොර්ඩ් එකත් අන්තිම සවුත්තු වූ බැවින් පවුලේ උදවිය මා දෙස කුමන දෙයකට උනත් බලන්නේ "මූ නම් ලොකු වෙන කොට IRC කාරයෙක් වෙන එක ෂුවර්" ලුක් එකකිනි. බොහෝ දෙනෙක් මට එය පවසාද ඇත. අප කන්ද බසින විට මගේ නැගණිය පඩි කිහිපයක් පෙරලී වැටුණු අතර, එයටද පුංචි අම්මලා, මාමලා මගේ කට සම්බන්ධ කලෝය. 

සුනිල් අයියා නමින් අප හඳුන්වන ඥාති සහෝදරයාත්, සීයාත් (මවගේ පියා) සහ පස් වන ශ්‍රේණියේදී පන්ති බාර ගුරුතුමාත් (මයුරපාල සර්) නොසිටින්නට බොහෝ විට මගේ ජීවිතය IRC කාරයෙකුගෙන් කෙලවර වන්න තිබුණි. නමුත් මේ තිදෙනා නිසා වයස 12 වන විට මම "ඩබ්ලිව් ඒ ද සිල්වාගේ ලක්ෂ්මි (හෙවත් නොනැසෙන රැජින) නවකතාවට වඩා මැක්සිම් ගෝර්කිගේ අම්මා හොඳයි කියන්නේ ඇයි?" කියා ඇසීමට තරම් පැසී තිබුණි (මට ඒ දවස්වල කොහොමටත් රුසියානු පරිවර්තන ඇල්ලුවේ නැත). 

කුඩා කල ලද අත්දැකීම් නිසාම මම මගේ සෙවනේ වැඩෙන පර්යේෂකයන් දෙස ඉතා කාරුණිකව අවධානය යොමු කරමි. ඔවුන් බොහෝ දෙනෙකුට "ඇයි" කියා ඇසීමට හුරු කරවීම සඳහා වසර දෙකක් පමණ ගතවේ. 

-------------------------------------------

ආගම් ඇතිවීම ගැන මා දකින ආකාරය පිළිබඳව මම ලිපි කිහිපයක්ම ලියා ඇත. මේ නිසා ඒ ගැන නැවතත් දීර්ඝ වශයෙන් ලිවීමට සිත් නොදෙයි. මේ අදහස් සම්පිණ්ඩනය කළහොත්; 

පරිසරයට ඇති බිය නිසා පවුලක් හෝ කුඩා සමුහයක් වශයෙන් සිටියදී පෞරුෂයක් සහිත වස්තුන්ගෙන් (ඉර හඬ, පර්වත, කඳු, විශාල රුක්ෂ ආදිය) ආරක්ෂාව පැතූ මානවයා, හේතූන් කිහිපයක් මත පසුව පංචෙන්ද්‍රියයන්ට ගෝචර නොවන බලවේගයක් හෝ බලවේගයන් වෙත තම විශ්වාසය තැබිය. එය වඩා සුරක්‍ෂිත ඇදහීමක් විය. ශිෂ්ඨාචාරය ගොඩනැගෙද්දී ස්වභාව ධර්මයෙන් ඇතිවන පීඩාවන් සමනය කිරීමට අමතරව මානව පාලනය සහ කළමනාකරණය සඳහා මෙම ඉන්ද්‍රිය ගෝචර නොවන බලවේගය අත්‍යවශ්‍ය විය. මේ අනුව බලවේගය-පුජකයා-පාලකයා යන ත්‍රිත්වය ශිෂ්ඨාචාරයක් පැවතීමේ මූලික අඩිතාලම බවට පත්විය. බලවේගය සඳහා දෙවියා, දෙවිවරු වැනි පුද්ගල ආදේශ කිරීම් මෙන්ම කර්මය වැනි ක්‍රියාවලියන් ආදේශයද සිදුවී ඇත.  මිනිසාට අදටත් තේරුම් ගත නොහැකි භෞතික සිරුරෙහි පැවැත්මේ අවසානය හෙවත් මරණය සහ ඉන් මතු පැවැත්ම, බලවේගය යන සංකල්පය පවත්වාගෙන යාමට විශාල වශයෙන් උපකාරී විය. 

ලොව මෙතෙක් බිහි වූ සෑම ආගමක්, දහමක්, දර්ශනයක්ම (මින් ඉදිරියට මේ සියල්ල ආගම යනුවෙන් හඳුන්වමි) පහල වන්නේ යම් සාමාජීය අර්බුදයකට විසඳුම් සෙවීමට බව මගේ හැඟීමයි. ලොව මෙවැනි සංකල්ප අනන්තවත් බිහිවී ඇත. එහෙත් ඒවායින් දිගු කාලීනව රැඳී ඇත්තේ අතලොස්සකි. මේ ලෙස දිගු කාලීනව පැවතීමේ රහස ඉතා පැහැදිලිය. ආගමක් දහමක් ඉදිරියට ගෙන යන්නේ පාලකයා සහ පූජකයාය (පූජ්‍ය-පූජක වැනි යෙදුම් හා නොගැටෙන්න. අදාළ සංකල්පය සමාජයට පැහැදිලි කරන්නා පූජකයා ලෙස මම හඳුන්වමි). ඔවුන්ට සමාජ පාලනය පහසු වන පරිදි කාලනුරූපීව වෙනස් කරගත හැකි සංකල්ප දිගු කල් වැජඹෙයි. 

සමාජය හොඳ-නරක අර්ථ දක්වන්නේ එම සමාජයේ පැවැත්ම තහවුරු වන ආකාරයටය. මේ අනුව හොඳ-නරක අදාළ කාල-අවකාශ රාමුවට සාපේක්ෂය. 

ආහාර ද්‍රව්‍ය ප්‍රවාහනය සඳහා පහසුකම් නොතිබූ යුගයක අර්ධ-කාන්තාර බද පෙදෙසක ජීවත්වන සමාජයකට නිර්මාංශ ආහාර මත යැපෙන්න යයි පවසන දර්ශනයක් ප්‍රයෝගික නැත. 

සතුරු බලපෑම් උග්‍රව පවතින අවස්ථාවක සියල්ලට වඩා සමුහය පොදු අරමුණකට යොමු කිරීම සාර්ථක නායකයෙකුගේ අවශ්‍යතාවයයි. එවිට සමුහය එකට බැඳ තබන දේව සංකල්පයට එරෙහිව යන මව-පියා-සොයුරු සොයුරියන් පවා ඝාතනය කිරීම නිවැරදි බව ඔවුන් පවසනු ඇත. 

සමහර අති දුෂ්කර කාලවකවානුවල හෝ අවස්ථාවල  අන්‍යන්ට නොදැනෙන පරිදි ඔවුන්ගේ දේ සොරා ගැනීම හෝ වංචා කිරීම, බොරු කීම යනාදිය වැරදි කරුණු නොවන බව පවා සමහර ආගම්වල සඳහන් විය. 

සාමාන්‍යය කාල වකවානුවල බොහෝ රටවල ගැහැණු-පිරිමි අනුපාතය 50:50ට ආසන්නවේ. එවිට විවාහය හෝ කායික සම්බන්ධය එක් ගැහැනියකට එක් පිරිමියෙක් ලෙස සම්මතයක් වීම සමාජ තුලිතතාවය රැකගැනීමට හේතුවෙයි. නමුත් දීර්ඝ කාලීන යුදමය වාතාවරණයකදී මේ සමතුලිතතාවය බිඳී ගැහැණු ගහණය සැලකිය යුතු ප්‍රමාණයකින් වැඩිවිය හැක. එවිට සමුහයේ පැවැත්ම සඳහා එක් පිරිමියෙකුට එක් ගැහැනියකට වඩා තමා සන්තකයට ගැනීම සමාජ අවශ්‍යතාවයක් විය හැක. මේ අනුව බහු භාර්යා සේවනය සමාජ සම්මතයක් බවට පත්වේ. එසේම කිසිම ආගමක් රජවරුන්ට අන්තත්පුර පවත්වාගෙන යාමට බාධා කර නැත. 

අවට සිටින අනෙක් මානව වර්ග සමග නිතරම ගැටුම් ඇතිවන සමාජ ව්‍යුහ තුල බිහි වූ සෑම ආගමකම පාහේ නූතන සමාජය විසින් ප්‍රතික්ෂේප කරන බොහෝ සංකල්ප දැකිය හැක. තමන් යටත් කරගන්නා බිම් කඩක සිටින මිනිසුන් වහලුන් ලෙස යොදවා ගැනීමේ හැකියාව, එබඳු යටත් වැසි කාන්තාවන් ලිංගික කටයුතු සඳහා අවශ්‍ය ආකාරයකට යොදා ගැනීම, යටත් වැසියන් තම ආගමට බලහත්කාරයෙන් හරවා ගැනීම හෝ නොඑසේ නම් මරා දැමීම මීට උදාහරණ කිහිපයකි. මේ සියල්ල දෙවියන්ගේ නියම ආකාරයෙන් ඉදිරිපත්කර ඇත. ඒ අනුව මෙම ක්‍රියා "හොඳ" කටයුතු බවට එකල සම්මත වී තිබුණි. 

මේ ලෙස හොඳ-නරක අර්ථ දැක්වෙන්නේ සමාජ අවශ්‍යතාවයන් මතය. මේ හොඳ-නරක කිසිවක් ඊට අදාළ නොවන කාල-අවකාශ රාමුවක් තුල විග්‍රහ කිරීම පලක් නැති බව මගේ හැඟීමයි. ලොව බොහෝ ගැටළු ඇතිවන්නේ එක් කාල-අවකාශ රාමුවකට අයත් හොඳ-නරක තවත් කාල-අවකාශ රාමුවකට බලහත්කාරයෙන් ඇතුලත් කිරීමට යාමෙනි.

-------------------------------------------

මගේ ලිපි කියවා ඇති බොහෝ දෙනෙක් මා නිරාගමිකයෙක්දැයි අසයි. මම ඔවුන්ට ඉතා සරල පිළිතුරක් දෙමි. 

"ඔබට මා නිරගමිකයෙක්ද යන ගැටලුව ඇතිවන්නේ ඔබ ඔබව ආගමිකයෙක් කියා ලේබල් කරගෙන සිටින නිසාය. ඔබ ඔබේ ආගමික ලේබලය ගැලවුවහොත් නිරාගමික සංකල්පයද ඒ සමගම මැකී යනු ඇත." 

මා හැමදාම පවසන පරිදි සියලුම ආගම් මොඩලයන්ය. මේ මොඩලය ඇත්තේ මරණින් මතු පැවැත්ම සහ එම පැවැත්මෙහි ස්වභාවය පාලනය කරන බලවේගය උදෙසාය. මොඩලයක් යනු අප නොදන්නා යමක් විස්තර කිරීමට උපකල්පනය කරන සංකල්පයකි. සියළු ඒබ්‍රහමියන් ආගම්වල මෙය ඉතා සරලව සහ පැහැදිලිව කියා ඇත. එනම් මරණින් මතු "ආත්මය" නමින් යමක් පවතින අතර එය දිව්‍ය තලයට යනවාද නිරයට යනවාද යන්න දෙවියන්වහන්සේ නම් බලවේගයක් මගින් තීරණය කරයි. 

මේ මරණින් මතු පැවැත්මද, දෙවියන් වහන්සේද, උපකල්පනයන් පමණකි. හින්දු ධර්මය ඇතුළු අනෙකුත් බොහෝ ඉන්දීය දර්ශන තුල (බුදු දහම හැර) "ආත්මය" නමින් යමක් මරණින් මතු පවතින අතර එය තවත් ජීවයක් අල්ලා ගැනීමෙන් පුනරුත්පත්තිය නම් සංසිද්ධිය ඇතිවේ. මෙම පුනරුත්පත්තිය සිදුවන ඊළඟ ජිවය සහ ඉන්පසු එහි පැවැත්ම "කර්මය" නම් ක්‍රියාන්විතයක් මගින් පාලනය වේ. මෙහිදීද මෙම ආත්මය සහ කර්මය උපකල්පන පමණකි. 

මේවා සියල්ල මොඩලයන් බැවින් එහි සත්‍ය-අසත්‍යතාවය පිළිබඳව කිසිවෙකුටත් සහතිකයක් දීමට නොහැක. 

ඉහත මොඩලය ශිෂ්ඨාචාරයේ යම් කාල අවකාශ ලක්ෂයකට අදාළ "හොඳ-නරක" අර්ථදක්වා ගැනීමටත් ඒවා ක්‍රියාවේ යෙදවීමටත් අත්‍යවශ්‍ය වේ. මේ මොඩලයේ බලපෑම නොමැතිව කිසිවෙක් ආගම විසින් අර්ථ දක්වන හොඳ-නරක පිළිගැනීමට මැලිවනු ඇත. මේ අනුව ආගම් මොඩල ශිෂ්ඨාචාරයේ පැවැත්මට අතිශයින් උපකාරී වී ඇති බව මගේ මතයයි. 

ආගමික මොඩලය ඉවත දමන විට මානව පාලනය සහ කළමනාකරණය සඳහා නීතියට එහා ගිය යාන්ත්‍රණයක් අවශ්‍යවේ. මෙය බොහෝ විට ඉතා ම්ලේච්ඡ මුහුණුවරක් ගැනීම ඉතිහාසය පුරාම දැකිය හැක. මා ඕ සේතුං, ජෝශප් ස්ටර්ලින් ලා තුලින් අප දුටුවේ මේ ම්ලේච්ඡත්වයයි. 

-------------------------------------------

මරණය යනුවෙන් අප හඳුන්වන සංසිද්ධියෙන් ඔබ්බට "මමය" හෝ "මාගේය" කියා හඳුන්වාදිය හැකි යම් භූතාර්ථයක් පවතී නම් එය භෞතික ශරීරයෙන් ස්වායත්ත වූ යමක් විය යුතුය. මගේ පෞද්ගලික හැඟීම නම් එබඳු යමක් නොපවතින බවයි. පංචස්කන්ධය සහ ඒ ආශ්‍රිතව ඇතිවන මනස-සිතුවිලි-කල්පනාව (mind-thoughts-intellect) යන එකිනෙක බැඳුනු සංසිද්ධි ත්‍රිත්වය මොලයේ ක්‍රියාකාරිත්වය අවසන්වීමත් සමගම නැතිවී යයි. ඉපදීමේ සිට මරණය දක්වා සිදුවන ජීවත්වීම නැමැති ක්‍රියාවලිය තුලදී සංවේදන පද්ධතිය (sensing system), ඉහත සංසිද්ධි ත්‍රිත්වය, සහ ප්‍රතිදාන පද්ධතිය (output system) එකිනෙකට පරායත්ත වූ අනුක්‍රමික ක්‍රියාදාමයක් (sequential process) හරහා ප්‍රතිපෝෂණ පුඩුවක (feedback loop) ගමන් කරයි. සංවේදන පද්ධතියෙන් ලැබෙන සංඥා සැකසීමෙන් (processing) අනතුරුව අවට ලෝකය හා ගනුදෙනුව උදෙසා ප්‍රතිදාන පද්ධතියට දැනුම් දෙන්නේ මනස-සිතුවිලි-කල්පනාව යන සංසිද්ධි ත්‍රිත්වයයි. මේ අනුව අප අවට ලෝකයට කරන බලපෑම තීරණය වන්නේ සංසිද්ධි ත්‍රිත්වය මතයි. 

උදාහරණයක් ලෙස කෙනෙකු මට යම් කාරණයකට දොස් පවරන විට සවන් නැමැති සංවේදන පද්ධතිය හරහා එය මට ඇසේ. මනස-සිතිවිලි-කල්පනාව යන සංසිද්ධි තුලින් මේ පිළිබඳව මා ගතයුතු පියවර තීරණය කරයි. එය මට බනින පුද්ගලයාට පෙරලා බැනීම, ඔහුට පහර දීම, කිසිත් නොකියා සිටීම, එතනින් ඉවත්වීම ආදී ප්‍රතිදාන ගණනාවකින් එකක් හෝ කිහිපයක් විය හැක. මේ අනුව මනස-සිතිවිලි-කල්පනාව පාලනය කරගැනීමෙන් තමන්ට හා සමාජයට වඩාත් යහපත් ප්‍රතිදානයක් ලබා දිය හැක. 

මේ ගැන වසර 2500ට පමණ පෙර ගෞතම බුද්ධ නම් තැනැත්තෙක් ඉතා සරලව විස්තර කර ඇත. එම විස්තරය පටිච්ච සමුප්පාදය නම් වේ. ඔහු ඉතා ඍජුවම "මම" හෝ "ආත්මයක්" කියා යමක් නැති බව ප්‍රකාශ කළේය. සමහර විට ඊට පෙර සහ ඊට පසුව විසූ පුද්ගලයන් ගණනාවක් මේ බව පෙන්වා දෙන්න ඇත. 

මෙම සංකල්පය ශිෂ්ඨාචාරයේ පැවැත්ම දැඩි අභියෝගයකට ලක් කරයි. මනස-සිතිවිලි-කල්පනාව පාලනය කරගැනීම තුලින් සමාජයේ අභිවෘද්ධියට හේතුවන ප්‍රතිදාන ලබා දීම යන කාරණය වෙනුවට මරණින් මතු පැවැත්මක් නැත යන කෙලවර පමණක් අති බහුතරයක් මානවයා විසින් අල්ලා ගැනීමට ඉඩකඩ ඇත. මේ සමගම සහශ්‍ර ගණනාවක් සිදු වූ එලොව පැවැත්ම සහ මනුෂ්‍යත්වය ඉක්ම වූ සුපිරි පාලක බලය මගින් සිදු කල මානව කළමනාකරණය බිද වැටේ. මරණින් මතු පැවැත්මක් හෝ මානව විඥානයට ගෝචර නොවන තීරක බලවේගයක් නොමැති වීම තුල පාලකයාගේ සහ පූජ්‍ය/පූජකයාගේ පැවැත්ම දැඩි අභියෝගයකට ලක්වේ. 

මේ නිසා ටික කලෙකින්ම නැවතත් මරණින් මතු පැවැත්ම සහ කර්මය නම් එවකට සහශ්‍ර කිහිපයක් ඉන්දියාවේ පැවති සංකල්ප බුදුදහම තුලට ඇතුල් කරන්නට ඇත. මා සිතන ආකාරයට බුදුදහම මෙතෙක් කල් පැවතීමටත් මේ කාරණයම පැවසූ සමහරුන්ගේ දහම් පිළිබඳව ඉතිහාසයේ කිසිඳු සලකුණක් නොතිබීමටත් හේතුව මෙලෙස බුදුදහමට මරණින් මතු පැවැත්ම ඇතුළු වීමයි. 

අදටත් බෞද්ධ විශාරදයන් (Buddhist scholars) මරණින් මතු පැවැත්ම ගැන විස්තර කිරීමේදී දැඩි අපහසුතාවයකට පත්වේ. "ආත්මය" යනු මරණින් මතු පැවැත්මයි. එක තැනකදී බුදුන් වහන්සේ ආත්මයක් නැත යයි පැවසූ බව කියන අතරම තව තැනකදී මරණින් මතු එම තැනැත්තාට අයත් යමක් මගින් තවත් තැනක උත්පත්තියක් හටගන්නා බව පවසයි. එනම් මරණින් මතු පැවැත්මක් තිබෙනා බව ඔවුන්ට පිළිගැනීමට සිදුවේ. මෙය පරස්පරය. මේ සඳහා භෞතික ශරීරයෙන් ස්වායත්ත වූ "සිත" නම් යමක් පවතින බවට ඉතා දුර්වල උපකල්පනයක් කිරීමට (මොඩලයක් ගොඩනැගීමට) මෙම බෞද්ධ විද්වතුන්ට සිදුවේ.  

මා සිතන ආකාරයට බුදුන් ඉදිරිපත්කල මොඩලය සමස්ථ සමාජයම අවබෝධ කරගැනීමට තරම් බුද්ධි වර්ධනයකට තව සහශ්‍ර දෙකක්වත් ගතවනු ඇත. එතෙක් දැන් පවතින බුදුදහමේ මොඩලය තවදුරටත් පැවතීම යහපත් වනු ඇත.  

-------------------------------------------

ඔබ ආගමික හෝ නිරගමික ලෙස ලේබල් ගතවී ඇත්නම් ඔබ ඉන්නේ බහාළුම් ගතවය. එනම් පෙට්ටියක් තුලය. ඔබගේ නිම්තෙර පෙට්ටියේ බිත්ති හයයි. ඔබ එහි සුරක්ෂිතය. එහෙත් එය ඉතා අසහනකාරී කූඩුගත සිරකරුවකුගේ ජීවිතයකි. ඔබ පෙට්ටිය තුල ජිවිතයට කැමති නම් ඒ සඳහා ඔබට පරම අයිතියක් ඇත. මම එයට අභියෝග නොකරමි. 

එහෙත් ඔබ පෙට්ටියෙන් එලියට පැමිණීමට කැමති නම් ඔබට ඉතා සුන්දර වචනයෙන් විස්තර කල නොහැකි ආනන්දජනක (blissful) හැඟීමක් ඇතිවනු ඇත. එය ඇත්තෙන්ම සැබෑ විමුක්තිය බව මට හැඟේ. ආගම මොඩලයක් පමණක් බව අවබෝධ කර ගත් විට ඔබට ඕනෑම අවස්ථාවක ඕනෑම මොඩලයක් තුලට ගොස් එහි අහ්ලාදය අත්විදිය හැක. මේ ආනන්ද ජනක තත්වය (blissful state) පිළිබඳව අප තව දිනෙක කතා කරමු. 

-------------------------------------------

කිසිවෙක් ආගමක් ඇදහීම, පිළිගනිම, පිළිපැදීම හෝ නොඇදහීම, නොපිළිගැනීම සහ නොපිලිපැදීම සම්පුර්ණයෙන්ම ඒ තැනැත්තා සතු පරම අයිතියකි. 

නමුත් ඔබට හැකි නම් අසන්නට ඔබගෙන්;

"ඇයි මට ආගමක් අවශ්‍යය" හෝ "ඇයි මට ආගමක් අනවශ්‍යය" කියා ඔබගෙන් සමාජයට සහ පරිසරයට මෙන්ම ඔබටද ලැබෙන බොහෝ අහිතකර ප්‍රතිදාන බෙහෙවින් අඩු කරගත හැකි වනු ඇත. 




Saturday, 17 September 2022

රනිල්-රාජපක්ෂ ජුන්ටාව සහ අනාගත අරගලය

අරගලය බොහෝ වෙනස්කම් කර ඇත. ඒවා අදෘශ්‍යමානයේ සිට ක්‍රමයෙන් දෘශ්‍යමානයට පිවිසෙමින් පවතී. අරගලයට භෞතිකව මෙන්ම සංකල්පීයවද සහභාගී වූ අති බහුතරයකට වුයේ එක් ආන්තික අරමුණකි. එනම් සමාජ-සාධාරණත්වයක් සහිත සමාජ-දේශපාලන ව්‍යුහයක් ගොඩනැගීමයි. ඒ සඳහා යා යුතු මග, ගත යුතු ක්‍රියා මාර්ග සහ එම ක්‍රියාමාර්ග ගත යුතු කාලය සහ තීව්‍රතාවය පිළිබඳව බොහෝ වෙනස් අදහස් සහ මතවාද විය. එහෙත් ආන්තික අරමුණ සමාන වීම තුල ලැබූ යහ ඵල බොහෝමයකි. මේ ලිපිය ඒ පිළිබඳව නොවේ.

රාජපක්ෂ රෙජීමයට එරෙහි අරගලයට වඩා රනිල්-රාජපක්ෂ ජුන්ටාවට එරෙහි අරගලයේ ක්‍රියාන්විතය විශාල වශයෙන් වෙනස් කල යුතුය. රාජපක්ෂ රෙජීමය යනු සොරකම, මංකොල්ලය සහ තක්කඩිකම සංකලනය වූ පාලන තන්ත්‍රයකි. එහි භිෂණය තිබුණ අතර එය වසා ගැනීමට දේශපාලකයා දැඩි උත්සහයක් ගත්තේය. දැන් පවතින "ආණ්ඩුව" ඒ සමුහයමය. මේ නිසා ඉහත නුහුගුණ මේ ආණ්ඩුව තුලද එලෙසම පවතී. රනිල් සහ එජාප දාමරිකයන් හරහා එයට ඉතා භයංකාර අංග ලක්‍ෂණ දෙකක් එකතු විය. එනම් කපටි-කෛරාටික දේශපාලන බුද්ධිය සහ දයා විරහිත සහ අසංවේදී ඝාතන මානසිකත්වය යන කරුණු දෙකයි. ඒ අනුව රනිල්-රාජපක්ෂ ජුන්ටාවට මුහුණ දීම එතරම් පහසු නැත. ඒ සඳහා ඔබ ස්මාර්ට් අරගලයකට පිවිසිය යුතුය. ස්මාර්ට් අරගලයක ලක්ෂණ පිළිබඳව අපි ඊළඟ ලිපියෙන් සාකච්චා කරමු.

අරගලයක සාර්ථකත්වය රඳා පවතින්නේ අරගලකරුවාට කෙතරම් ගැඹුරකට යතාර්ථය තේරුම් ගැනීමට හැකියාව ඇතිද යන කරුණ මතයි. ලංකාවේ වර්තමානය කලාපීය සහ ගෝලීය භූ දේශපාලනයෙන් ස්වායත්ත කොට සමාජ-ආර්ථික විසඳුම් ඉදිරිපත්කිරීම විහිළු සහගතය. මේ නිසා අපි යථාර්තය තේරුම් ගනිමු. ලංකාවට මේ වන විට ඇති ණය බරත්, විදේශ ආධාර සහ තව දුරටත් ගතයුතු ණය මත යැපීමත්, අපනයන සහ සංචාරක ව්‍යාපාරය මත පදනම්වූ ආර්ථිකයත් නිසා අපට අනිවාර්යයෙන්ම ඉන්දු-ඇමරිකාවාදී හෝ චීන-රුසියාවාදී නැඹුරුවකට යා යුතුවම ඇත. මට පෙනෙන්නේ මේ වන විට අපට පළමු කණ්ඩායම තෝරා ගැනීම අනිවාර්ය වී ඇති බවයි. ජනතාව ඉල්ලන නායකත්වය ඉන්දු-ඇමරිකා එකඟත්වයෙන් ලබා ගත යුතුව ඇත. 

----------------------------------------

මහජන මතයට එරෙහිව තමාට නතුවන රූකඩ පාලකයෙක් අනෙක් රටවල පැල කිරීමට යාමේ අමිහිරි අත්දැකීම් ඇමරිකාව ලැබුවේ මීට වසර 50ට පමණ පෙර වියට්නාමයේදීය. මේ නිසා පසු කාලයක ඔවුන් හැම විටම උත්සහ කලේ මහජනතාවගේ කැමැත්ත සහිත තමාට අවශ්‍යදේ කරගත හැකි නායකයන් අවශ්‍ය රටවල බිහි කිරීමයි. අනූව දශකයෙන් පසු ජනතාවගේ හිත දිනා ගන්නා අතරම තමන්ගේ අවශ්‍යතාවයන් ඉටුකර දිය හැකි බුද්ධිමත් පාලකයන් කෙරේ ඇමරිකාව වඩ වඩාත් නැඹුරු වන්නට විය. මේ අතරින් පාලකයා වුමනාවට වඩා ස්මාර්ට් වන්නට ගියහොත් හෝ ඇමරිකාවට කිසිඳු වැඩක් නැති ගොබ්බයෙකු වුවහොත් මහජන විරෝධයෙන්ම ඔවුන් ඉවත් කිරීමටද ඇමරිකාව වගබලා ගනී. පර්වේෂ් මුෂරෙෆ්, ඉම්රාන් ඛාන්, හොස්නි මුබාරක් too smart වීම නිසා ඇමරිකාවේ ගිලටීනයට අසු වූ පාලකයන්ය. දෙවෙනි කාණ්ඩයට හොඳම උදාහරණය ගෝඨාභය රාජපක්ෂයි. ඇමරිකානු පුරවසියෙකුද වන ඔහු ජනධිපතිවරණයට ඉදිරිපත් වූ විට ඊට බාධාවක් වූ එම ඇමරිකානු පුරවැසිභාවය සම්බන්ධයෙන්ද ඔහුව ගලවා ගැනීමට ඇමරිකානු තානාපති කාර්යාලය ඉදිරිපත් විය. ඔවුන් ප්‍රකාශ කලේ ඔහුගේ ඇමරිකානු පුරවැසිභාවය ඉවත්කර ඇති බවයි. නමුත් පසු කලෙක හෙළිවූයේ මේ ඉවත්කිරීම බලාත්මක වී ඇත්තේ ඊට මාස ගණනාවකට පසු බවයි. 

ඇමරිකාවෙන් දෙනු ලැබූ උපදෙස් සහ අනෙකුත් රාජපක්ෂ සහෝදරයන්ගේ චීන ගැති බව අතර ගෝඨාභය අසරණ වූ බව මගේ හැඟීමයි. ඔහුගේ උපන්ගෙයි උද්දච්චකම සහ දේශපාලන නූගත්භාවය අතරද ඔහු සිරවිය. ඉන් මිදීමට ඔහු ගත් සියළු පියවර අතිශයින්ම ගොබ්බ සහ අමන තීරණ විය. එහි ප්‍රතිඵලය දැන් ඉතිහාසයට එකතු වී හමාරය. 

----------------------------------------

චීනය තමන්ට අවශ්‍ය රූකඩ පත්කරගන්නේ ඇමරිකාවට වඩා වෙනස්ම ආකාරයකටයි. ඒ රටේ සියළු දේශපාලකයන්, දුෂකයන් සහ වංචනිකයන් බවට පත්කිරිමෙනි. මේ තත්වය අනුව පක්ෂ පාට බේදයකින් තොරව දේශපාලකයන්ට එකිනෙකා මත පරායත්ත වීමට සිදුවේ. අද අප අත්දකින්නේ මේ අවාසනාවන්ත ක්‍රියාවලියේ ප්‍රතිඵලයයි. ගෝඨාභයට මේ බව අවබෝධ කර ගැනීමටවත් බුද්ධියක් තිබුණේ නැත. අවසානයේදී ඔහු තනිවිය.

ඇමරිකානු තානාපතිනිය දැන් ලංකාවේ සියළුම කටයුතුවලට අත පොවයි. මැති ඇමතිවරුන් දැන් සමාජයට දැඩි බියක් දක්වයි. ඔවුන් යාමට සිතන්නේ වත් නැති ගොවි සමිති රැස්වීම් වලට පවා ජූලි චැන්ග් පිය නගයි. මෙය වියට්නාම් ක්‍රමවේදය බව මගේ වැටහීමයි. එනම් රටේ ජනතාව සංස්කෘතිකව සහ ආකල්පීයව ඇමරිකානු පක්ෂපාතී (US loyal) මානසිකත්වයකට රැගෙන ඒමයි. ඉදිරියේදී ඇමරිකානු තානාපති කාර්යාලය, ඊට අදාළ ආයතන, හෝ පෞද්ගලික අංශයේ අනුග්‍රහයෙන් සංස්කෘතික ප්‍රසංග, ක්‍රීඩා තරඟාවලි, යොවුන් කඳවුර, අධ්‍යාපනික සහ කාර්මික පුහුණු වැඩසටහන් ආදිය රට පුරා දියත්වනු ඇති බව මගේ හැඟීමයි.

මට පෙනෙන්නේ ඉදිරි වසර තුල චීනය ලංකාවෙන් ඈත් වනු ඇති බවයි. යන යකා කොරහත් බිඳගෙන යන්නා සේ ඔවුන් ලංකාවෙන් මස් රාත්තලම ඉල්ලනු ඇත. මෙහිදී අප වඩ වඩාත් ඉන්දු-ඇමරිකා ගැතිභාවයකට පත්වනු ඇත. මැලේසියාවේ මොහොමඩ් නජීබ් පාලනයෙන් පසු චීන ණය දාමයෙන් ඉවත්වීමට දරනු ලැබූ උත්සහයේදීද මෙවැනිම තත්වයක් ඇතිවිය. එහෙත් මැලේසියාව ලෝකයේ ඉහල පෙලේ පෙට්‍රෝලියම් නිෂ්පාදකයෙකු වූ බැවින් ඔවුන්ට ඇමරිකාව ප්‍රමුඛ බටහිර ලෝකයේ සහය ඇතිව ඉතා සුක්ෂමව මෙම කාර්ය සිදුකල හැකි විය (ඇත්තෙන්ම එය තවමත් සිදුවෙමින් පවතී). නමුත් ලංකාව වැනි බංකොලොත් රාජ්‍යයක් කුමන තත්වයකට වැටේදැයි මට වැටහීමක් නැත. මීට අමතරව මැලේසියාවට වඩා ලංකාවේ භූ පිහිටීම මත ඇතිවන කලාපිය දේශපාලන සංකීර්ණතාවය බරපතලය. 

----------------------------------------

අප කැමති වුවත් නැතත් ඉන්දු-ඇමරිකා අවශ්‍යතා සපුරාලමින් අපට ඔවුන් පෙන්වන මග යායුතුව ඇති බව මගේ වැටහීමයි. මෙහිදී ඉන්දියාවේ කාර්යභාරය පිළිබඳව මනා තක්සේරුවක් නිරන්තරයෙන් කල යුතුව ඇත. එය පිහි දාරයක ඇවිදිනවා වැනි අවදානම් ගමනකි.

ඒ ගමන යාමට සිටිය යුතු නායකයා රනිල් නොවන්නේ ඇයි?

රනිල් වික්‍රමසිංහ යනු අසාර්ථක බව එක්වරක් දෙවරක් නොව හයවරක්ම පෙන්වූ නායකයෙකි. ලංකාවේ අගමැතිවරයා ලෙස ඔහු කරන්න ගොස් එවකට සිටි ජනාධිපතිවරයාගේ විරුද්ධවීම මත ඔහුට කරගත නොහැකි වූ එක යහපත් කාර්යයක් කිසිවෙකුටත් පෙන්විය හැකිද? 

මා දකින ආකාරයට රනිල්ගේ එකම අභිප්‍රාය ජනාධිපති පුටුවේ හැකි තරම් කාලයක් වැජඹීමයි. ඔහුට නැවතත් චන්දයක් දිනා නගර සභාවකටවත් තේරී පත්වීමට නොහැකි බව ඔහු දනී. එසේම පක්ෂ බේදයකින් තොරව පාර්ලිමේන්තුවේ සිටින අති බහුතරයක් මන්ත්‍රීවරුන්ට නැවතත් චන්දයකින් දිනිය නොහැකි බව ඔවුන් දන්නා බවද රනිල් දනී. එසේම යම් පමණකට හෝ සාධාරණ වූ රජයක් යටතේ මොවුන් බොහෝ දෙනෙකුගේ අනාගතය සිපිරිගෙය බව ඔවුන් දන්නා බවද රනිල් දනී. ඔහු කරන්නේ මේ පාර්ලිමේන්තුවේ පවතින වියවුල් මානසිකත්වය කළමනාකරණය කිරීමයි. 

චොකා මල්ලිලාගෙන්, සනත් නිශාන්තලාගෙන්, ප්‍රසන්න රණතුංගලාගෙන් සැදුම් ලත් මෙගා ඇමති මණ්ඩලයකින් රටක් සංවර්ධනය කරනවා තියා එය පවත්වාගෙන යාමද විශාල අභියෝගයකි. ඔවුන් දන්නේ සොරකම පමණි. රනිල්ද මේ බව දනී. නමුත් දේශපාලන අනාගතයක් නැති ඔහුට එහි වගක් නැත. 

රාජපක්ෂලාට නොතිබුණු කපටි-කෛරාටික දේශපාලන බුද්ධිය තමා සතු බව රනිල් පැමිණි විගසින් පෙන්නුම් කළේය. එතෙක් රටේ තිබුණු ඉන්ධන, ගෑස් සහ අත්‍යවශ්‍ය බොහෝ ද්‍රව්‍යවල මිල ඔහු ඉතා විශාල ප්‍රමාණයකින් වැඩි කළේය. මේ අනුව පහල මධ්‍යම පන්තිය සහ ඉන් පහල සියළුම ජන ස්ථරවල ක්‍රය ශක්තිය විශාල වශයෙන් අඩුවිය. අද ඇත්තේද එදා රටේ තිබුණු ද්‍රව්‍ය සංචිත ප්‍රමාණයම හෝ ඊට අඩු ප්‍රමාණයකි. එහෙත් අද පෝලිම් නැත. බඩු නැතැයි කියා කාටවත් පැමිණිලි කල නොහැක. එහෙත් තිබෙනා ද්‍රව්‍ය මිළදී ගැනීමට මුදල් නැත. සාමාන්‍යයෙන් ලාංකික ජනතාව කරන්නේ යමක් ඉතා සුළු ප්‍රමාණයෙන් හෝ ලබා ගත හැකි වේ නම් ඉන් සෑහීමකට පත්වීමයි. මේ නිසා පහල මධ්‍යම පන්තිය සහ ඉන් පහල පන්තිවල අරගලය දියවී ගොස් ඇත. 

ඉහල මධ්‍යම පන්තිය සහ ඉන් ඉහල පන්ති "අපිට නම් ඉතින් කොහොම හරි කරගන්න පුළුවන්. අරයල පව් නේ" මානසිකත්වයෙන් පසුවෙයි. ඔවුන් බොහෝ දෙනෙක් පවතිනා තත්වය පිළිබඳව ඇත්තෙන්ම සතුටු වෙති. "දැන් පෝලිම් නැහැ, තර්ඩ් ක්ලාස් මිනිස්සු සුපර් මාර්කට් වලට එන්නේ නැහැ. පාරේ වාහන අඩු නිසා කූල් එකේ වැඩට යන්න පුළුවන්" මේ ඔවුන්ගේ සමාජයේ කතිකාවතයි. එසේම ඔවුන් පවුල් පිටින් එතෙර පදිංචියට යයි. නැත්නම් තම තරුණ දූ පුතුන් රට පටවයි. "They have no future here අනේ" මේ ඔවුන් නිතර පවසන වදන් පෙළකි.

----------------------------------------

මෙවැනි දුෂිත දේශපාලකයන් ආණ්ඩු කරන රටක් ඉතා වේගයෙන් අස්ථායි වන බව ඇමරිකාව ප්‍රමුඛ බටහිර රාජ්‍ය දනී. එය ඔවුන්ගේ බල ව්‍යපෘති ක්‍රියාවේ යෙදවීම සඳහා විශාල බාධාවකි. මේ නිසා ඔවුන් කරන්නේ තම අවශ්‍යතාවයන් ඉක්මනින් ඉටු කර දිය හැකි රටට කිසිඳු වැදගම්මක් නැති පුද්ගලයන් කෙටි කාලීනව පත්කරගැනිමයි. මෙය මීට දශක දෙකක තුනකට පෙර ලතින් ඇමරිකානු රටවලද (banana republics ලෙස හඳුන්වන රටවල්), මේ දක්වා බොහෝ මැදපෙරදිග රටවලද ක්‍රියාත්මක කරයි. 

රනිල්-රාජපක්ෂ ජුන්ටාව දිගටම සිටීමේ බරපතල අනතුර මෙයයි. 

මා දකින ආකාරයට අප හැකි විගසින් නව නායකත්වයක් සහ දැක්මක් බිහි කරගත යුතුය. අප කෙතරම් අකමැති වුවත් මෙම නායකත්වයට ඇමරිකාවට අවශ්‍ය දේ කිරීමට සිදුවනු ඇත. ඒ පිළිබඳව ජනතාව දැනුවත්වීම වැදගත්ය. මෙතෙක් කිසිඳු පලක් නොවූ දෙලොවටම වැඩ නැති පුහු දේශාභිමානී විලපයන්ට දැන්වත් අප තිත තැබිය යුතුය. "පළමුවත්, දෙවනුවත්, තෙවනුවත් මගේ රට" කියමින් පපුවට ගසා ගෙන මුළු රටම මංකොල්ල කා, කාබාසිනියා කල දේශපාලනයෙන් දැන්වත් ඈත්වී ඇත්ත ඇති සැටියෙන් දැකිය යුතුය. දුෂණයෙන් භීෂණයෙන් තොර වූ ලී ක්වාන් යූ පන්නයේ හෝ අඩුම ගණනේ දැලි පිහියෙන් කිරි කෑමට හැකි පර්වේෂ් මුෂාරෆ් පන්නයේ නායකත්වයක් බිහි කරගත යුතුය. අනෙක් අතට මුෂාරෙෆ්ට අත්වූ ඉරණම එම නායකයාට නොලැබෙන ආකාරයට වෙනස් කල ජන මනසක් බිහි කල යුතුය. 

මේ නායකත්වය බිහිවන්නේ කොතනින්ද යන්න අප සියළු දෙනාම තමන් සිටිනා පෙට්ටිවලින් එලියට විත් සාකච්චා කල යුතුය. 






 

Friday, 9 September 2022

බුද්ධිය ඇති උන් නැති උන් වෙනුවෙන්



ගී කියන උන් ගීත ගයපල්ලා 

ගී ලියන උන් ගීත ලියපල්ලා 

කවි ගොතන උන් පදවැල් ගොතපල්ලා 

කෙටිකතා නවකතා ලියන උන් 

පෑන මැනවින් හසුරුවාපල්ලා 

වේදිකාවේ නටන උන් 

පුංචි තිරයේ රඟන උන් 

නටල රඟලා රටටම කියපල්ලා                                                                                                                              

දේසපාළුවා අත්වැල් බැඳගෙන 

රටේ සම්පත් කොල්ල කන හැටි 

වහල් බැම්මෙන් ජනමනස වෙලලා 

බුද්ධි හීනයෝ බිහිකරපු හැටි 

කියා දීපල්ලා 

මැටි පිරුණු හිස් කබල් සොලවා 

ඇත්ත ඇති සැටියෙන් තේරෙන තෙක් 

කරුණු කියපල්ලා 


වේ හුඹස් අභියසද කුදු වන අමනයන්




 


Friday, 12 August 2022

අරගලය නිම විය

 


ගෝල්ෆේස් අරගලය නිම විය. ඒ ගැන වැටෙන පෝස්ට් නිමක් නැත. ඒවා ලංකාවේ ජන විඥානය කියාපාන කැඩපත් වැනිය.

අරගලය සාර්ථකද අසාර්ථකද යන්න තීරණය වන්නේ අරගලය තුලින් ඔබ බලාපොරොත්තු වූ හෝ නොවූ ප්‍රතිදාන මතය. එහි මුඛ්‍ය සටන් පාඨය වූ "Go home Gota" යන්න අරගලයේ අරමුණ කරගත් පිරිසට මෙය අති විශිෂ්ඨ නිමාවකි. System change එකක් වෙනුවෙන් අරගලයට එක්වූ පිරිසට එහි ප්‍රතිඵලය ඉතා අසතුටුදායකය. මේ අන්ත දෙක අතරේ අරගලයේ යහ ඵල කිහිපයක්ම ඇත. System change එකක් වෙනුවෙන් පෙනී සිටිනවා යයි කී සමහරුන්ගේ ඇත්තම අරමුණ වී තිබුණේ Coruption-ownership change එකකි. එනම් උඹලා කැමති හොරා වෙනුවට අපි කැමති හොරා රජකිරීමයි. 

මා දකින ආකාරයට අරගලයේ අග්‍ර ඵල දෙකකි. ඉන් පළමුවැන්න ලංකික ජන විඥානය ප්‍රායෝගිකවම අවබෝධ කරගැනීමට ඒ සඳහා උනන්දුවන අයට ලැබුණු අවස්ථාවයි. එය ලංකාව ගොඩ දැමීමට උණක් යන්තමට හෝ තවමත් ඇති සියළු දෙනාටම අනාගතයේදී බොහෝ සෙයින් උපකාරී වනු ඇත. 

දෙවැන්න ලංකාවේ ක්‍රියාකාරී අති බහුතරයක් දේශපාලකයන් එකම ජාලයක ඉත්තන් බව ස්ථිර වශයෙන්ම සාක්‍ෂාත් වීමයි. 

------------------------------------------

බොහෝ දෙනෙකුට දැන් අරගලය ඇරඹෙන්න හේතු පාදක වූ කරුණු මතක නැත. සමහරු දැන් කතාකරන්නේ එය අසුරු සැනෙකින් ඕපපාතිකව පහල වුවා සේය.

කෙටියෙන් කියන්නම්. අරගලය ඇරඹීමට පෙර රටේ කිලෝ මීටර ගණන් දිග තෙල්, ගෑස් පෝලිම් විය. සාගතය හිස ඔසවා තිබුණි. සංචාරක ව්‍යාපාරය පමණක් නොව රටේ සෙසු බොහෝ කර්මාන්ත බිඳ වැටී තිබුණි. උද්ධමනය ඉතා ඉහල අගයක තිබුණි. මාස කිහිපයක සිට රට ආර්ථික වශයෙන් බංකොලොත් වී තිබුණි.

අරගලයෙන් විනාශ වෙන්න තරම් දෙයක් රටේ ඉතිරි වී තිබුණේ නැත.

අරගලයේ මූලිකත්වය ගත්තේ දේශපාලන මෙන්ම සාමාජීය වශයෙන්ද පරිනත නොවූ තරුණ ජවයකි. එයට නායකත්වයක්, මාර්ග සිතියමක්, පැහැදිලි අරමුණක් සහ ඉලක්ක ලබා දිය යුතු විය. නමුත් එය කල යුතුව තිබූ අත්දැකීම් බහුල ක්‍රියාකාරී දේශපාලන ප්‍රවාහ එය මග හැරියෝය. ඒ ගැන මම කිහිප වරක්ම ලිව්වෙමි. 

------------------------------------------

දේශපාලකයන්ට පවරා ඇති නඩු, නීතිපති විසින් තාක්‍ෂණික හේතු මත ඉවත් කරගත් නඩු, කෝප් කමිටු වාර්තා සහ වෙනත් අනේක කොමිෂන් වාර්තා අනුව මේ රටේ පක්ෂ විපක්ෂ භේදයකින් තොරව අති බහුතරයක් දේශපාලුවන් මහජන මුදල් ගසා කා ඇති බව සක් සුදක්සේ පැහැදිලිවේ. නොඑසේ නම් රුපියල් ට්‍රිලියන ගණනක මුදල් බහිරවයා ගිල්ලා විය නොහැක. WWE සහ ලංකාවේ පාර්ලිමේන්තුව අතිශයන්ම සමාන වන්නේ මේ හේතුව නිසාය. ඔවුන් එක් පවුලකි. එකෙකුට එකෙක් නැතුව බැරිය. 

ලංකාවේ බහුතරයක් ජනතාවගේ දැනුම් සම්භාරය තුල මේ ගැන දත්ත ඇත. නමුත් මට දැනෙන ආකාරයට මේ දැනුම විශ්ලේෂණය කර තේරුම් ගැනීමට තරම් තර්ක බුද්ධියක් බොහෝ දෙනෙකු සතුව නැත. එය උගත්-නුගත් කියා වෙනසක් නැතිව සමාජය තුල පිළිබිඹු වේ. තේරුම් ගන්නා සුළුතරය අතර පවා තේරුම අවබෝධය කරා ගෙන යාම පිණිස මානසික අවස්ථිති පවුර තරණය කර ගත හැකි අය සිටින්නේ අතලොස්සකි. 

අරගලය ඇති වන්නේ තමා පෙළන, තම ධනය සොරා කන, පාලක පැලැන්තියට එරෙහිව පද්ධති වෙනසක් සඳහා බව ලංකාවේ බහුතරයක් පාලිතයන්ට වැටහෙන්නේ නැත. අරගලය සමච්චලයට ලක් කරමින් පෝස්ට් පලකරන කිසිවෙක් රටේ යස ඉසුරින් වැජබෙන ධනපතියන් නොවන බව නම් ඉතා පැහැදිලිය. පාලකයාගේ හොර තක්කඩි අමන කම් හේතුවෙන් දරිද්‍රතාවය හිස මත තබාගෙන, බසයක පා පුවරුවේ එල්ලී යන පහල මධ්‍යම පාන්තිකයා, තම පීඩකයා වෙනුවෙන් පෙනී සිටින සමාජයක, system පෙරලන්නට පෙර, පෙරලන්න ඇති දේ බොහෝය.    




Saturday, 6 August 2022

ලංකාවට what happened? එදා අද සහ හෙට පලිඟු බෝලයෙන්


කුඩුකාරයාට මොනවා කලත් කුඩු නැතිව බැරිය. ලංකාව ගැන උණ තියෙන එකාටද එසේමය. කෙතරම් නවත්වන්න සිතුවත් ඇසිල්ලක් ලද සැනෙන් ලියන්නම සිතේ.

මේ ලියන්නේ මගේ දැනුම් සම්භාරයේත්, විශ්ලේෂණ හැකියාවේත් උපරිමය තුල හැකි අවමයට මානසික අවස්ථිතිය අඩු කරගෙනය.

-------------------------------------

මට ලාංකිකයා පිළිබඳව ඇත්තේ විමතියකි. මගේ මූලික විෂය පථය සමාජ මනෝ විද්‍යාව වුවා නම් මම අඩුම ගණනේ ලාංකික ජන විඥානය පිළිබඳව high impact papers තුනක්වත් පළ කරමි. 

අරගලය පැමිණිය යුතුවම තිබුණි. ඒ තරමට ලාංකික දේශපාලනය පිරිහීමකට ලක්ව ඇත. රට වේගයෙන් බංකොලොත්භාවයට පත්වන බව දුර තියාම කිව්වේ මා පමණක් නොවේ. දේශපාළුවා ඒ තරමට ඇස් පනාපිටම සොරකමෙහි යෙදුනේය. මංකොල්ලය කෙතරම් ම්ලේච්ඡ තත්වයකට වැටුනේද යත් කොවිඩ් රෝගයෙන් දැඩි ලෙස පෙලෙන සමාජයෙන් පවා ඔවුහු කඩා වඩා ගත්තෝය. මේ කාලකන්ණි තත්වය මා කිසිඳු දුෂිත අප්‍රිකානු රටක පවා දුටුවේ නැත.  

මෙතරම් දරුණු මංකොල්ලයක් ඇස් ඉදිරියේ දකිත්දිත් බහුතරයක් තම ප්‍රියතම දේශපාලුවා රැකගැනීමට නොයෙක විද අමන කතා දෙඩීය. ඉන්දියාවේ හා බංගලාදේශයේ මා මේ මානසික දුර්වලතාවය දුටුවේ නූගත් ගැමි පරිසරයන් තුලයි. එහෙත් ලංකාවේ මෙලෙස කතා පැවසුවො සමාජයේ උගතුන් යයි පෙනී සිටින්නන් වුහ. රට වැටෙන්නේ කොවිඩ් නිසා යයි ඔවුන් පවසද්දී ලෝකයම එයට ගොදුරු වූ බව මෙනෙහි කරගන්න තරම් ඔවුන්ට හැකියාවක් නොවීය. තවත් සමහරු කොවිඩ් නිසා සංචාරක ව්‍යාපාරය වැටුණු බැවින් ලංකාව බංකොලොත් වූ බව කීය. ලංකාවට වඩා ඉතා අධික ලෙස සංචාරක ව්‍යාපාරය මත තම ආර්ථිකය පවතින මාල දිවයින, තායිලන්තය වැනි රටවල් අපුරුවට මේ තත්වයෙන් ගොඩ ආ බව වටහා ගැනීමට ඔවුන්ට හැකියාවක් නොවීය. 

-------------------------------------

අරගලය ඇරඹෙන්නේ මහජන විරෝධය තුලිනි. එය කෙනෙකුට අවබෝධ නොවන්නේ නම් එය ඔහුගේ දුර්වලකමකි. අරගලයට මිනිසුන් සුදානම් වන විට සජබය මෙන්ම ජවිපෙද තමන් ඊට සම්බන්ධ නැති බවත් එයට සම්බන්ධ වන අය පිළිබඳව තමන්ගේ වගකීමක් නැති බවත් කීය. පැහැදිලිවම මෙය විකල්ප බලවේගයක් නැගී සිටීම පිළිබඳව ඔවුන් තුල ඇති භීතිය ප්‍රදර්ශණය කිරීමක් ලෙස මම දකිමි. අරගලය තීව්‍ර වෙමින් ජයග්‍රහණ අත්පත් කරගන්නා විට ජවිපෙ නායකයන් කියා සිටියේ තමන්ගේ තරුණ පෙළ අරගලයේ සක්‍රියව සිටින බවයි. එහි පහල කේඩරයද සමාජ මාධ්‍ය තුල අරගලය වෙනුවෙන් නිවේදන නිකුත් කරමින් ඉදිරියෙන්ම පෙනී සිටියේය. 

අරගලය බිඳ වැටෙමින්, දියාරු වෙමින්, වියැකී යන විට ජවිපෙ ඉහල පෙලෙන් සද්දයක් නැත. පහල කේඩරයද හිමින් සීරුවේ මාරු වී ඇත. ජවිපෙ කිසිවෙක්, මා දන්නා තරමින් පොලිස් අත්අඩංගුවේ නැත. ඔවුන්ගේ මේ "දිනුවොත් අපේ - පැරදුනොත් තොපේ" සංකල්පය මේ වන විට ඔවුන්ට පාරාවළල්ලක් වී ඇති සෙයකි. ජවිපෙට යම් ප්‍රසාදයක් පළකරමින් සිටි, ඊට පෙර කවදාවත් ජවිපෙ ගැන පැහැදීමකින් නොසිටි පිරිස නැවතත් ඔවුන්ට අහිමි වෙමින් පවතී. මිනිසුන් ජවිපෙ වෙතට තල්ලු වුණේ ඔවුන් පිළිබඳව ඇතිවූ පැහැදීමකින් නොව අනෙක් දේශපාලුවන්ගේ තිබු අන්ත දුෂිත ස්වභාවය නිසා බව ඔවුන්ට නොතේරී ඇති සේයකි. තම නායකයන්ගේ  තීරණවල ඇති ගැටළු පෙන්වා දෙන විට පණිවිඩකරුට වෙඩි තැබීමේ ස්වභාවය ඔවුන්ට අත් හැරගැනීමට නොහැකි වී ඇත. 

-------------------------------------

මැලේසියාවේ, බංගලාදේශයේ, පකිස්ථානයේ, නේපාලයේ, කොලොම්බියාවේ, සැම්බියාවේ, උගන්ඩාවේ සහ තවත් අප්‍රිකානු රටවල් කිහිපයකම රාජ්‍ය පාලනයට බලවත් රටවල් අතදාන ආකාරය මම first hand අත්දැකීම් තුලින් වටහාගෙන ඇත්තෙමි. මේ නිසා මට ලංකාවේ සිදුවන බොහෝ දේ ඉවකිරීමේ හැකියාව ඇත. ලංකාව වැනි අන්ත දුෂිත මෙන්ම අමන මානසිකත්වයක් ඇති දේශපාලකයන් සිටින රටවලට මැදිහත්වීමට බලවත් රටවල් අතර ඇත්තේ පොරයකි. ලංකාව තුල 2010 වසරේ පමණ සිට පැහැදිලිවම කඳවුරු දෙකක් පොරකමින් සිටියෝය. ඒ චීනය-පකිස්ථානය සහ ඇමරිකාව-ඉන්දියාව යන යුගල දෙකයි. මෙයින් මහින්ද රාජපක්ෂ ප්‍රමුඛ කණ්ඩායම හොරකමට වඩා පහසු pro-Chinese පිළට හේත්තු විය. 

චීනය ණය දෙන ආකාරය සහ එය කළමනාකරණය කරන ආකාරය පිළිබඳව මම මුලින්ම ලියන්නේ මගේ දෙවැනි උගන්ඩා ගමන අතරතුරය. ඒ 2013 වසරේදීය. ඔවුන් ඉතා සාර්ථක මාර්ග සිතියමක යමින් ලංකාව සිය අණසකට නතු කරගත්තේය. අද IMF එකට සහ ඇමරිකාවටත් කියන්න සිදුවී ඇත්තේ මුලින් චීනය සමග ඇති පටලැවිල්ල ලිහාගෙන ඊට පස්සේ අපෙන් උදව් ඉල්ලන්න එන්න කියාය. 

ඇමරිකාව ගෝඨාභයව ගෙන එන්නේ මේ චීන ආධිපත්‍ය වෙනස් කිරීමටයැයි මට සිතේ. එහෙත් ඔහු කිසිම වැදගැම්මකට නැති පතෝලයෙක් බව තේරුම් ගන්නට ඔවුන්ට වැඩි කල් ගියේ නැත. ගෝඨාට මහින්දලාව ඉන්නා තැනින් අඩියක් වත් පිටුපසට ගැනීමට නොහැකි විය. රාජපක්ෂලාගේ ගොන්කම නිසා අරගලය ඇති වන්නේ මේ අවස්ථාවේය. අරගලය නොව රට තුල කුමන වෙනසක් වීමට මුල පිරුවත් බලවතුන් එයට අත දැමීම ලංකාව වැනි හිඟන රටකට වැළක්විය නොහැක. 

ඇතිවෙමින්  තිබූ රැල්ල සමග කොළඹ ඇමරිකානු තානාපති කාර්යාලය ලංකාවේ ඊළඟ නායකයා ලෙස අනුර කුමාර දිසානායක හඳුනාගත් අවස්ථාවක්ද විය. නමුත් එය ලත් තැනම ලොප් වුණේ ජවිපෙ අනුගමනය කල පතෝල න්‍යාය හේතුවෙනි. ආසයි-බයයි සෙල්ලමට බලවතුන් කැමති නැත. සජිත්ට අත් වුනේද ඒ ඉරණමයි. තව ටික කාලෙකින් සජිත් ප්‍රේමදාස යන නම ලාංකීය දේශපාලනයෙන් මැකී අමතකවී යාමට නියමිතය. 

-------------------------------------

මීට ටික කලකට පෙර ලංකාවේ සිටි දේශපාලකයෙක් නොවන ඉහලම රාජ්‍ය තාන්ත්‍රිකයෙක් මා සමග කුළුපඟ කතාබහක යෙදෙන විටක ඔහු රනිල්ව හැඳින්වුයේ baby-faced serial killer යනුවෙනි. අපි දෙදෙනා මෙහි සිංහල පරිවර්තනය සොයන්න ගොස් නැවතුණේ "බබා-මුහුණු වැල් ඝාතකයා" යන වැකියෙනි. අපි එදා මහා හඬින් සිනා සෙද්දී කෙදිනක හෝ රනිල් ලංකාවේ ජනාධිපති වේ යයි අංශු මාත්‍රයකවත් හැඟීමක් නොවීය. 

රනිල් පිළිබඳව අටුවා ටීකා ලිවීමට අවශ්‍ය නැත. ඔහු ගැන නොදන්නා 90 දශකයෙන් පසු උපන් ළපටියන්ද මේ සති කිහිපයට ඔහු පිළිබඳව යම් වැටහීමක් ලබා ගෙන ඇති සිතමි. රනිල් යනු program කරන ලද රෝබෝවකි. ඔහු රාජපක්ෂලාව bail out කරයිද නැත්නම් සිපිරිගෙට හෝ එල්ලුම් ගසට යවයිද කියා ඔහුවත් දන්නේ නැති බව මම සිතමි. එය තීරණය කරන්නේ programer විය හැක. රාජපක්ෂලාට රනිල් සමග හැරෙන්නවත් නොහැකිය. ඒ රනිල්ගේ හැකියාව නොව programer ගේ කෙරුවාවයි. අද රනිල්ගේ ගුණ වයන රාජපක්ෂ ගැත්තන් තව මාස කිහිපයකින් කුමක් කියයිදැයි මම උපේක්ෂාවෙන් බලාගෙන සිටිමි. 

රනිල් ජනපති වන්න සති කිහිපයකට පමණ පෙර ඔහු එම තනතුරට පත්වන බව කොළඹ ඉහල diplomatic circle එක දැන සිටි බව මගේ හැඟීමයි. සාමාන්‍යයෙන් මෙවැනි අවශ්‍යතාවයක් ඇති විට තානාපති කාර්යාලය කරන්නේ අදාළ සියලුම පාර්ශවවලට තම අවශ්‍යතාවය දැනුම් දීමයි. ඉන්පසු ඔවුන් යම් විගඩමක් ජනතා තිරය මත පෙලගස්වයි. එය එසේම සිදුවිය.  

දැන් මම නැවතත් ලාංකික ජනතාව ගැන මතක් කරමි. පට්ට හොරුන් සෙට් එකක් පත්කරගෙන, ඔවුන්ව නඩත්තු කරමින්, තවමත් ඔවුන්ගේ ගුණ ගායන කරමින් සිටින සමහර පිරිස් ලංකාව අද පත්වී ඇති අසරණ හිඟන තත්වය පිළිබඳව ඇමරිකානු තානාපති කාර්යාලයට පලු පැලෙන්න බැනීම හාස්‍යජනක නොවේද?

මෙතැන් සිට කොයිබටද?

-------------------------------------

මහජන අරගල ඇතිවන්නේ සංවිධානාත්මක මග පෙන්වීමකින් නොවේ. ලංකාවේද එය ඇතිවන්නේ එලෙසමය. එහෙත් ඇතිවන ජන රැල්ලට නායකත්වයක්, මාර්ග සිතියමක්, අරමුණක්, ඉලක්කයක් ඇතිවිය යුතුය. ලංකාවේ පැවතුන තත්වය අනුව එවැනි බාරකාරත්වයක් ලබාගත යුතුව තිබුණේ ජවිපෙයි. රට පුරා වූ දැවැත්ත සංවිධාන ජාලයක් තිබුණේ ඔවුන්ට පමණකි.  නමුත් ඔවුන් ඒ කාර්ය භාරයෙන් කර ඇරියේය. ඒ සඳහා ඔවුන්ට දහසකුත් එකක් හේතු කියන්නට ඇත. 

දැන් රටේ ජනතාවට අරගලය පිළිබඳවද ඇත්තේ අවිනිශ්චිත හැඟීමකි. රනිල් එළවීම පිළිබඳව අරගලයේ ඉදිරියෙන් සිටින තරුණ පිරිස් පලකරන අදහස් ඉතා බොළඳය. ඔවුන්ට තමන් හැප්පෙන්නේ කා සමගද කියාවත් අවබෝධයක් නැත. සරත් ෆොන්සේකා කිරීමට අර අඳින්නේ  මේ නොමේරු තරුණ ජවය තුලින් තම ජනපති සිහිනයට ලඟා වන්නය. එය කරන්නේද ජවිපෙ මෙන්ම "හරි ගියොත් මගේ - වැරදුනොත් තොපේ" style එකටමය. මෙය ඔහු පසුපස යන තාරුණ්‍යයට අතිශයින් භයානක අත්දැකීම් ඇති කර දෙනු ඇත. රනිල් වික්‍රමසිංහ යනු හැඟීම් දැනීම් විරහිත පුද්ගලයෙකි. කෙටියෙන්ම කිවහොත් දේශපාලන රෝබෝවකි. කොළඹ වටලා හෝ වහසි බස් දොඩා හෝ, අපහාස උපහාස කර හෝ, ඔහුට දන්වන්න නොහැකිය. තරුණ පිරිස පමණක් නොව සරත් ෆොන්සේකාද ඔහු ඉදිරියේ අත දරුවන්ය.

මේ අවස්ථාවේ මහා මැතිවරණයක් පැවැත්වුවත් ඉන් කිසිඳු වෙනසක් වනු ඇතැයි මම නොසිතමි. මිනිසුන්ගේ ආවේගය දැන් හීන වෙමින් පවතී. එබැවින් ආවේග චන්ද ලබා ගැනීමටද දැන් ජවිපෙට හෝ විකල්ප කණ්ඩායමකට නොහැකිය. ප්‍රතිඵලය පරණ හොරුන්ම නව මුහුණුවරකින් පත්වීමයි. 

එසේ නම් කල යුත්තේ කුමක්ද?

-------------------------------------

මේ මට සිතෙන ආකාරයයි. කුමන පක්ෂයක් හෝ කණ්ඩායමක් බලයට ආවත් ඊළඟ වසර දෙකහමාර යා යුත්තේ "එදා වෙලා ටුවර්ස්" mode එකෙනි. සිඟමන් හැරෙන්න අපට කිසිවක් නොලැබෙනු ඇත. ඒ සිඟමන් වලින්ද පාර්ලිමේන්තුවේ සිටින යාචකයන් තමන්ට විශාල පංගුවක් බෙදා ගනු ඇත. ඔවුන් ඒ තරමටම කාලකන්ණි අපතයන් පිරිසකි. මෙය වැළක්විය නොහැක. ඒ අතරම ඔවුන් එකිනෙකා මරා ගනු ඇත. ඊළඟ මාස කිහිපයේදී "වෙන්න ජනාධිපතිලා" ගණනාවක් පාර්ලිමේන්තුව තුල බිහිවනු ඇත. රාජපක්ෂලා රනිල් එළවීමට හැකි සෑම ප්‍රයත්නයක්ම දරනු ඇත. රනිල් ඔහුට සුපුරුදු විශේෂඥතාවය උපයෝගී කරගෙන පොහොට්ටු කඳවුර මෙන්ම සජබ කඳවුරද බේද බින්න කරනු ඇත. මේ විප්‍රකාර මධ්‍යයේ කිසිවෙකුටත් රට නැගීමට වෙලාවක් නොතිබෙනු ඇත. 

බුද්ධියක් ඇති සියළු දෙනාගේම වගකීම විය යුත්තේ ඊළඟ වසර දෙක හමාර තුල පවතින ක්‍රමයට එරෙහිව ප්‍රබල හා තීව්‍ර ජන මතයක් ගොඩ නැගීමයි. දැන් බලාපොරොත්තුවේ පහන් සිළුවක් හෝ දල්වා ගැනීමට ඇති එකම මාර්ගය එයයි. මේ මාර්ග සිතියම තුල ජවිපෙ සිටීම අතිශයින් වැදගත්ය. නමුත් ඔවුන් ජනතාවගේ එකම ගැලවුම්කරුවාගේ චරිතය රඟ දැක්වීමට යාම ඔවුන්ට මෙන්ම රටටද ඉතා අහිතකර ප්‍රතිඵල ගෙන දෙනු ඇත. 

කිසිම දේශපාලකයෙකුව කිසිම මහජන උත්සවයකට වැද්ද නොගැනීම, ඔවුන් බලහත්කාරයෙන් පැමිණෙන උත්සව වර්ජනය කිරීම, ඔවුන් මහජනයා  ගැවසෙන ස්ථානවලට (සුපර් මාර්කට්, හෝටල්, ආපනශාලා, පංසල්, පල්ලි, කෝවිල් ආදිය) පැමිණෙන විට ශාරීරික පීඩා නොකර වචනයෙන් සහ අභිනයෙන් විරෝධය පෑම, දේශපාලකයන්ට ආරාධනා කරන නෑ හිත මිතුරන්ගේ උත්සව වලට නොපැමිණෙන බව සියළු දෙනාටම දැන්වීම. එසේ දන්වා සිටියදී දේශපාලකයෙක් පැමිණියහොත් ඊට විරෝධය පා උත්සව ශාලාවෙන් පිටවී යාම, ගම් මට්ටමින් (කඩපිලේදී, පොලේදී, පන්සලේ පල්ලියේදී, වගා බිමේදී) මහජනතාව මේ පිළිබඳව දැනුවත් කරවීම, රජයේ අකටයුතු පිළිබඳව හැකිතාක් ජාත්‍යන්තරය දැනුවත් කිරීම, දුෂණ, භීෂණ, වංචා විරෝධය ඇතිවිය යුත්තේ තමා තුලින්ම බව ජනතාවට ඒත්තු ගැන්වීම, ඒ පිළිබඳව ජනතාව දැනුවත් කිරීමට සමාජ මාධ්‍ය උපරිමයෙන් යොදා ගැනීම, නගර මට්ටමින් සම්මන්ත්‍රණ පැවැත්වීම, පොලිසිය සහ හමුදාව සමග සුහදව කටයුතු කිරීම (ඔවුන් කිහිප දෙනෙකුගේ වැරදි මත පදනම්ව සමස්ථ ගොනුවටම එරෙහි නොවන්න) ඔබට ගත හැකි ක්‍රියා මාර්ග කිහිපයකි.

-------------------------------------

කුමක් කලත් නීතියේ රාමුවෙන් පිටතට පය නොතබන්න. පාලකයා බලා සිටින්නේ ඔබ ඒ වරද කරන තුරුය. ජාත්‍යන්තරය ඔබ සමග සිටින්නේ ඔබ අනීතික නොවන තාක්ය. නිතීඥ සංගම්, වෛද්‍ය  සංගම් ආදී වූ වෘත්තීය ව්‍යාපාර පිළිබඳව විශ්වාසය නොතබන්න. ඔවුන් බොහෝ විට පවතින දේශපාලන මඩ ගොහොරුවේම අනු-ඛණ්ඩයන්ය.  

ඉදිරිය දුෂ්කරය. නමුත් කෙසේ හෝ ජිවත්වන්න. යුද්ධය පැමිණෙන විට ඔබ ජීවත්වීම රටට ඉතා වැදගත්ය. බබා-මුහුණු වැල් ඝාතකයෙකුට ඔබගේ ජීවිතය උදුරා ගැනීමට ඉඩ නොතබන්න. 










Thursday, 4 August 2022

සෝමාලි pirate buisiness මොඩලය


සෝමාලි මුහුදු මකොල්ලකරුවෝ ඉන්දියන් සයුරේ යාත්‍රා කරන නැව් කිහිපයක් අත්පත් කරගෙන විශාල මුදලක් කප්පම් ලෙස ලබා ගත්තෝය. නැව් රක්‍ෂණ සමාගම් අධික ලෙස රක්ෂණ වාරික වැඩි කලහ. ඒ සමගම පකිස්ථානය, ඉන්දියාව, ලංකාව සහ දකුණු අප්‍රිකාව යන රටවල පෞද්ගලික ආරක්ෂක සමාගම් බිහිවිය. රක්‍ෂණ සමාගම් තමා වැඩිපුර අයකරන මුදලෙන් සෑහෙන කොටසක් මේ ආරක්ෂක සමාගම්වලට දී ඔවුන්ගෙන් ship-escort සේවය ලබා ගනිති. නැව් සමාගම් තමා වැඩිපුර ගෙවන රක්ෂණ මුදල ආනයන/අපනයන කරුවන්ගෙන් අය කරගනිති. ආනයන/අපනයන කරුවෝ මේ වැඩිපුර ගෙවන නැව් ගාස්තුව පාරිභෝගිකයාගෙන් අයකර ගනිති. මේ අතර සෝමාලි මුහුදු කොල්ලකරුවන්ට උන්ඩියල් ක්‍රමයට මාස් පතා හොඳ මුදලක් ලැබේ. 

දැන් සෝමාලි මුහුදු මංකොල්ලකාරයන් ගැන වැඩිය අසන්න නැත. එහෙත් මේ අපූරු ව්‍යාපාරය ඉතා සරුවට සිදුවේ. 

මුහුදු මංකොල්ලකාරයන්ට සතුටුය, නිකන් තුවක්කුවක් එල්ලගෙන ඉදහිට බෝට්ටුවක ගොස් මාසේ අන්තිමට යහමින් මුදලක් අතට ලැබේ. 

නැව් සමාගම්වලටත් සතුටුය, ඔවුන්ට සෑහෙන විශාල  ප්‍රවාහන ගාස්තුවක් ලැබේ.

රක්ෂණ සමාගම්වලටත් සතුටුය, ඔවුන් අධික රක්ෂණ මුදලක් ලබාගනී. 

ආරක්ෂක සමාගම්වලටත් සතුටුය, ඔවුන් ආයුධ සමග බෝට්ටු කිහිපයක් escort එකට ලබා දී හොඳ මුදලක් ලබා ගනී. 

උන්ඩියල්කාරයන්ටත් සතුටුය, ඔවුන් ඔවුන්ගේ ව්‍යාපාරය සරුවට කරගෙන යයි. 

මේක නියම සතුටු සාදයක්. 


--------------------------------------------------

සෝමාලියාව ලෝකයේ ඇති දුප්පත්ම රටකි. දරිද්‍රතාවය දරාගත නොහැකි තැන සෝමාලි තරුණයෝ අවි අයුධ ගෙන රජයට එරෙහිව කැරළි ගැසීය. සිවිල් යුද්ධය නිසා සෝමාලි රජය සහ එහි නාවික හමුදාව අකර්මන්‍ය විය. එම අවස්ථාවෙන් ප්‍රයෝජනගත් අවට රටවල්වල ධීවරයෝ සෝමාලි මුහුදේ මත්ස්‍ය සම්පත නෙලාගන්න විය. ඉමහත් පීඩාවකට පත් ධීවරයෝ කැරළිකරුවන්ගේ පිහිට පැතීය. කුඩා පෞද්ගලික හමුදා ලෙස සංවිධානය වූ කැරළිකරුවෝ විදේශික ධීවර බෝට්ටුවලට පහර දුන්හ. මේ වෙනුවෙන් ඔවුන් ධීවරයන්ගෙන් ගාස්තුවක් අය කළේය. මෙය හොඳ ආදායම් මාර්ගයක් බවට අවබෝධකරගත් රැකියා විරහිත තරුණයෝ වැඩි වැඩියෙන් මේ රැකියාවට අවතීර්ණ විය. නමුත් මේ ව්‍යාපාරය තිරසාර නොවීය. විදේශ ධීවර බෝට්ටු පැමිණීම නැවතීමත් සමගම මේ ආරක්ෂක සේවයේ අවශ්‍යතාවය නිම විය. 

මේ අවස්ථාවේ මේ සෝමාලි ජාතිකයන් අවට මුහුදේ සංචාරය කරන අරාබි ධනවතුන්ගේ සුඛෝපභෝගී බෝට්ටු කිහිප වරක් තම අත්අඩංගුවට ගෙන කප්පම් ලබා ගත්හ. මෙය ධීවරයන්ගෙන් ලැබෙන ගාස්තුවට වඩා අධික විය. නමුත් මෙයද තිරසාර නොවීය. ධනවත් බෝට්ටු හිමියන් මේ ප්‍රදේශයට පැමිණීම සීමා කළහ.

මේ අතර මෙම සෝමාලි කොල්ලකරුවන්ට මොගඩිෂු නුවර සිට උණ්ඩියල් (හවාලා) ක්‍රමයට විදේශ රටකින් එවන ලද මුදල්, බර අවි, සහ අධිවේගී බෝට්ටු කිහිපයක් ලැබුණි. ඒ සමගම ඔවුන් මුහුදු මංකොල්ලකරුවන් බවට පත්විය. එතැන් සිට ඉහල ඇති කතාව ඇරඹෙයි.


 

Sunday, 31 July 2022

මෝක්ෂය මෙයයි. නිර්වාණය කුමක්ද?

මට තේරෙන අද්වෛත මොඩලය වචන දෙකක වැකියකින් විස්තර කල හැක. එනම් "මමද ඔබමය" යන්නයි.

සරල උදාහරණයක් ගමු. විශාල රත්තරන් ගොඩක් සලකන්න. එය අර්ථ දැක්විය හැක්කේ රත්තරන් ලෙස පමණි. දැන් මේ රත්තරන් ගොඩෙන් ස්වල්පයක් ගෙන ඉන් මාලයක්, කරාඹුවක් සහ වළල්ලක් සාදමු. දැන් අර රත්තරන් ස්වල්පයට මාලයක්, කරාඹුවක් ආදී වූ හැඳින්වීම් ඇත. ඊට විශේෂණ පදද එකතු කල හැක. දැන් මාලය උණු කර සළඹක් සාදමු. එයට දැන් මාලය යයි නොකියමු. එය සළඹකි. සළඹ උණු කර මුද්දක් සෑදුවොත් එය මුද්ද ලෙස හැඳින්වේ. තරමක් ගැඹුරින් සිතුවොත් මේ සියල්ලටම ඇති එකම සත්‍ය රත්තරන් යන්නයි. මාල, වළලු, මුදු, කරාඹු අවස්ථාව අනුව පෙනෙන මායාවන් පමණි. 

ලොව පවතින්නේ එකම සත්‍යයයි. ඒ බ්‍රහ්මන්. අප දකින අනෙක් මුළු විශ්වයම මායාවක් (බ්‍රහ්ම සත්‍යා ජගත් මිත්‍යා). බ්‍රහ්මන් සහ මහා බ්‍රහ්මයා පටලවා ගන්න එපා (මහා බ්‍රහ්මයා ද්වෛත වේදාන්ත සංකල්පයක්). බ්‍රහ්මන් යනු නිර්ගුණ (property-less), නිර්-අර්ථ (undefinable), නිර්මාන (dimensionless), නිර්ලිංග (non-gender) භූතාර්ථයක් (Dr Nalin ගෙන් සොරාගත් මේ වචනය මම යොදන්නේ තේරුම් ගත නොහැකි යමක් කීමටයි). මුළු විශ්වයම බ්‍රහ්මන් පමණයි. සමහර විද්වතුන් බ්‍රහ්මන් dark matter/dark energy  ලෙස හඳුනාගන්න උත්සහ දරනවා. 

ඔබද මාද පීටර්ද මොහමඩ්ද කියා ඇති වෙනස මාල, වළලු, මුදු, කරාඹු වැනිය. මේ සියල්ලේම ඇත්තේ බ්‍රහ්මන්ය. ආත්මය නම් මේ බ්‍රහ්මන්ය. මම යනු බ්‍රහ්මන් වන අතර ඔබද, පීටර්ද මොහොමඩ්ද බ්‍රහ්මන් වේ. මෙය සමස්ථ බ්‍රහ්මන් ගෙන් වෙනස් නොවේ. අද්වෛත සහ ද්වෛත වේදාන්ත වෙනස්වන්නේ මෙතනදීය. අද්වෛත වේදාන්තය අනුව මාද, ඔබද දෙවියන්ද එකමය. ආත්මය හෙවත් බ්‍රහ්මන් නිර්ගුණ, නිර්-අර්ථ, නිර්මාන, නිර්ලිංග භූතාර්ථයක් බව නැවත මතක් කරගන්න. 

ඊළඟ විස්තරයට පෙර තවත් උපමාවකින් මම මෙය වඩාත් තහවුරු කරන්නම්. බ්‍රහ්මන් මුහුදේ ජලය සේය. මම, ඔබ, පීටර් සහ මොහොමඩ් මුහුදේ නැගෙන රැලි සේය. එක් ක්‍ෂණයකට අපි අර රැල්ල, මේ රැල්ල ලෙස හැඳින් වුවත් එහි ඇත්තේ ජලයමය.

උත්පත්තියක් යනු ආත්මය පංච කෝෂයක් තුලට ඇතුළු වීමයි. මෙය ජලය බඳුනකට පුරවනවා වැනිය. පංච කෝෂ යනු; අන්නමය කෝෂ (ආහාර මගින් ඇතිවන සිරුර), ප්‍රාණමය කෝෂ (ජීව ශක්තිය), මනෝමය කෝෂ (මනස), විඥානමය කෝෂ (ඉංග්‍රීසි බසින් conscouseness ලෙස හැඳින්වෙන මේ අද්වෛත වෙදාන්තයේ එන විඥාණය සිංහලෙන් තර්ක ඥානය ලෙස හඳුන්වා දිය හැක), ආනන්දමය කෝෂ (ඉංග්‍රීසි බසින් blissfullness ලෙස හැඳින්වෙන මේ සංකල්පය සිංහලෙන් දිව්‍යමය සතුට හෝ ආනන්දජනක බව ලෙස හැඳින්විය හැක).

ජීවීන් ලෙස අප හඳුන්වන භූතාර්ථයන්ට බොහෝ විට පංච කෝෂ ඇත. සමහර භූත, ප්‍රේත, පහල තලයේ දේව කොටස්වලට අන්නමය කෝෂය හෝ අන්නමය සහ ප්‍රාණමය කෝෂ නැත. සමහර ඉහල දේව ගණයන්ට ඇත්තේ විඥානමය සහ ආනන්දමය කෝෂ පමණි, ඉහලම බඹ තලවල ඇත්තේ ආනන්දමය කෝෂය පමණි. ආත්මයක් කෝෂ තැනීම අත්හල විට එය සමස්ථ බ්‍රහ්මන් හා බද්ධ වේ. ඉන්පසු එයට අර්ථ දැක්වීමක් නැත. එය බ්‍රහ්මන්මය. මෙය මෝක්‍ෂය නම් වේ. 

අද්වෛත වේදාන්තයට අනුව අපට පංචෙන්ද්‍රියයන්ට නතුවන හෝ නොවන ජීවින්, භූත, ප්‍රේත, දෙව් බඹුන් ඇතුළු සියළුම දේ (බ්‍රහ්මන් හැර) යථාර්තයන් නොවේ. ඒවා මායවන්ය. මරණය හෝ චුතවීම නම් සංසිද්ධියේදී ආත්මය එක් කෝෂ පද්ධතියක් හලා තව එකක් අල්ලා ගනී. කර්මය නම් ස්වභාවික රීතිය බලපැවැත්වෙන්නේ පංච කෝෂ මත මිස ආත්මය මත නොවේ (නිර්ගුණ භූතාර්ථයක් මත කිසිවක් බලපැවැත්වෙන්නේ නැත). මරණයෙන් මතු ඊළඟ කෝෂ පද්ධතිය තීරණය වන්නේ කෙසේද යන ආකෘති හැසිරීම මම මේ වන විට හදාරමින් සිටිමි. 

දෙවියන්, ප්‍රේතයන් ආදී භූතාර්ථයන්ද මායාවේම කොටස් බැවින් ගනුදෙනු ඇතිවන්නේ එම භූතාර්ථයන් සහ පංච කෝෂ අතර පමණි. ආත්මයට කිසිම බලපෑමක් කිරීමට මේ මායාවන්ට නොහැක.

දුකට හේතුව මනස විසින් පංච කෝෂ "මම" යයි  වැරදියට වටහා ගැනීමයි. සියළු ගුණ බලපැවැත්වෙන්නේ පංච කෝෂ මතයි (සතුට, වේදනාව, දුක, භීතිය, ආදී). අප අවදියෙන් සිටින විටද, තද නින්දේ සිටින විටද, සිහින දකින විටද ආත්මය හෙවත් "මම", මම යයි මගේ මනස හඳුනා ගත් මම දෙස බලා සිටියි. මෙය අප චිත්‍රපටියක් බලනවා වැනිය. චිත්‍රපටයේ මිනිසුන්ට, සතුන්ට නොයෙකුත් දේ සිදුවේ. නමුත් භෞතිකව මට එය බලපාන්නේ නැත. අප චිත්‍රපට බලන්නේ මේ නිසාය. මේ ලෙසම "මම" හා පංච කෝෂ අතර පරතරය අවබෝධ කරගත හැකි නම් "දුක" එතකින්ම නිම වේ. 



Thursday, 28 July 2022

ඉහිරුණු තීන්ත පැල්ලම

මීට දොළොස් වසරකට පමණ පෙර මට චීනයේ ශාන්ෂි ප්‍රාන්තයේ (Shanxi Province) ඇති ශුංග්ලින් පන්සල (Shuanglin Temple) වෙතට යාමේ භාග්‍ය උදා විය. UNESCO ලෝක උරුමයක් ලෙස නම් කර ඇති එහි මින්ග් රාජවංශයට (Ming Dynasty) අයත් කලා කෘති ගණනාවක් ඇත. මුලින් හමුවන සෑම මුර්තියක්, සිතුවමක්ම චායාරූප ගත කරන බොහෝ දෙනෙකු ටික වෙලාවකින් එය අත හැර දමන්නේ මෙය නිමක් නොවන කාර්යයක් ලෙස වැටහෙන බැවිනි. 

පන්සලේ එක් කෙළවරක ඇති බෝධිසත්ව රූපයක මුහුණේ මුර්ති ශිල්පියාට වැරදීමකින් රතු තීන්ත පාරක් ඉහිරී ඇත.

පන්සලේ සංචාරයෙන් පසු බස් රථය තෙක් පිරිස සමග පැමිණෙන මග පෙන්වන්නිය පිරිසගෙන් පැනයක් අසයි. මෙය ඇය දිනපතා පැමිණෙන සෑම නඩයකින්ම අසන දෙයක් විය හැක. 

"ඔබ මේ පංසලේ දැකපු හොඳටම මතක ඇති දේ කුමක්ද?"

"එක පිළිමයක මුහුණේ වැරදීමකින් තීන්ත පාරක් වැක්කෙරී ඇත" මේ අති බහුතරයකගේ පිළිතුරයි.

ඉන් පසු එම මග පෙන්වන්නිය අපූරු විස්තරයක් කරමින් එය වැරදීමක් නොව අධිරාජ්‍යයාගේ අණ පරිදි මුර්ති ශිල්පියා සිතා මතාම කල දෙයක් බව පවසයි. පන්සලෙන් පිටවන අයට පෙනෙන ලෙස එකල අධිරාජ්‍යයා පුවරුවක් සවිකර තිබූ බවට ඉතිහාසයේ සඳහන් වෙයි. එහි ලියා තිබී ඇත්තේ 

"ඔබ දුටු දහස් ගණනක් අති අලංකාර මූර්ති වලින් ඔබට මතක ඇත්තේ ඉහිරුණු තීන්ත පැල්ලම පමණයි. මින් පසු මා කල නරක දෙයක් දුට විට මෙය මතක් කරගන්න".

දහසක් තීන්ත පැල්ලම් අතර එක හොඳ පිළිමයක්වත් නොසාදන නුතන පාලකයාගේ සිට මින්ග් රාජවංශය වෙත අපි පිය නගමු.


  


Wednesday, 20 July 2022

ඔබට සුබ අනාගතයක් - Adiós


මේ ලිපිය මා ලියන්නේ දෛවෝපගත දිනකය. පාර්ලිමේන්තුවේ එකඳු ආසනයක්වත් දිනාගත නොහැකි වූ පක්ෂයක පුද්ගලයෙක් රටේ විධායක ජනාධිපති ලෙස දිව්රුම් දෙන දිනයකය. සමහර විට දිගු කලකට මා ලංකාවේ දේශපාලනය පිළිබඳව ලියන අවසන් ලිපිය මෙය විය හැක. 

මා දන්නා බොහෝ දේ ලිවිය නොහැක. එයට හේතු ඇත. නමුත් ජනතා මෙහෙවරක් ලෙස මම සෑම විටම ඔබට යම් ඉඟියක් දීමට උත්සහ කලෙමි. එය කියවා ගැනීමට සමහර සහෘදයන් සමත් විය. 

රනිල්; ඔහු යන්නේ රාජපක්ෂලා සිතන ගමනවත් අරගලකරුවන් සිතන ගමනවත් නොවේ. රනිල්ට ස්වාමියෙක් ඇත. ඔහුගේ ගමන එම ස්වාමියා විසින් pre-program කරන ලද්දකි. ඒ සඳහා ඔහුට ජනතා ප්‍රසාදයක් හෝ පාර්ලිමේන්තුවේ බහුතරයක් අවශ්‍ය නැත. මන්ද ඔහු පත්වන්නේ මේ කිසිවක් නොමැතිවය. මේ නිසා ඔහු ජනතාවටවත් පාර්ලිමේන්තුවටවත් වග කිව යුතු නැත. එය රනිල්ගේ ගමනටම ඉඳිකළ ස්වර්ණමය මාර්ගයකි. 

මේ ගමනට මම පෞද්ගලිකව දැඩි ලෙස බිය වීමි. මේ නිසාම එයට එරෙහිව මට හැකි අයුරින් හඬ නැගුවෙමි. එම හඬ අද මම නිහඬ කරමි. අද ඇති දේශපාලන ගතිකය තුල රනිල්ගේ ගමනට බාධා කිරීම ලාංකිකයාට අතිශයින්ම භයංකාරය. මේ බව අරගලය තේරුම් නොගන්නා බව මට සහතිකය. එය ඔවුන් අනාගතයේදී දුෂ්කර මාර්ගයෙන් තේරුම් ගනු ඇත. යථාර්තය තේරුම් ගැනීමට තරුණ ජවය මැලිය. එය දැඩි අවාසනාවන්ත තත්වයකි. 

ඔබ වියට්නාමය සහ පිලිපීනය ගැන අධ්‍යනය කරන්න. මේ රටවල් දෙකේම නායකයන් ඇමරිකන් ගැති විය. වියට්නාම් ජාතිකයන් ඉතා ඉක්මනින් ඇමරිකන් ගැතිබාවය වැළඳ ගත් අතර පිලිපීන වැසියන් කොටසක් එයට දැඩි ලෙස විරුද්ධ විය. අද වියට්නාම් වැසියන් බොහොමයක් සතුටින් ජිවත් වෙයි. ඔවුන් තම සංස්කෘතිය සහ සාම්ප්‍රදායික ආගම (බුදු දහම) ඇමරිකන් ගැති බාවය වෙනුවෙන් අත හැරියේය. ඒ වෙනුවට ඔවුන්ට හොඳ ගෙවීමක් ලැබුණි. අද වියට්නාමය වේගයෙන් දියුණු වෙයි. ඔවුන්ට ඇමරිකන් විසා ලබාගැනීම පවා  ඉතා පහසුය. පිලිපීනයේ තත්වය තරමක් වෙනස්ය. 

ඔබ 2500 මෙව්වා එක ගැන ආඩම්බර වුනා පමණකි. එයින් කිසිවක් උකහා ගැනීමට හෝ එම එඩියෙන් ඉදිරියට යාමට උත්සහ කලේ නැත. අද ඔබ පමා වැඩිය. කාලකන්ණි නායකයන් රොත්තක් මත බලාපොරොත්තු තබා ඔබ හිඟන්නන්ගේ තත්වයට පත්ව ඇත. තව දුරටත් ඔබට bargaining powers නැත. මේ බව අවබෝධ කරගන්න. රනිල් පසුපස යන්න. ඔබගේ 2500 ක ආඩම්බරය සහ සංස්කෘතිය අකුළා ඉන්දියන් සාගරයට දමන්න. ජීවත්වීමට මුල් තැන දෙන්න. සමහර විට ඔබගේ මී මුණුපුරන් නැවතත් ඔය අතීත ශ්‍රී විභූතිය ගැන සිතනු ඇත. ඔවුන් වෙනුවෙන් යමක් ලියා තබන්න. 

මෙතෙක් මා ලංකාවේ දේශපාලනය ගැන පැවසූ දේ කියවූ ඔබට බොහොම ස්තුතියි





Saturday, 16 July 2022

වසර 2500 ක මෙව්වා එක


ලාංකිකයා ඒකාධිපති ලක්ෂණ සහිත රජෙකු යටතේ සිටි වසර 2500 පමණ කාලය හා සසඳන විට මහජන නියෝජිත ක්‍රමය යටතේ සිට ඇත්තේ වසර 75 ට අඩු කාලයකි. ජන සමුහ විඥානය පිළිබඳව හැදැරීමේදී අපට වැටහෙන කරුණ නම්  ඔවුන්ගේ මානසික විභවය වෙනස් කිරීමට මේ සුළු කාලය කිසිසේත්ම ප්‍රමාණවත් නොවන බවයි. යුරෝපයේ රටවල් බොහොමයක මේ කාලය වසර 1000-1500 ක් පමණ වන අතර ඇමරිකාව, ඔස්ට්‍රේලියාව, නවසීලන්තය ආදී රටවල රජ ආණ්ඩු පැවතුනෙම නැත. යුරෝපයේ රාජාණ්ඩු පෙරලුණේ බොහෝ විට මිනිසුන් එයට එරෙහිව නැගී සිටි බැවිනි. නොඑසේ නම් පළවන සහ දෙවන ලෝක යුධවල කුරිරු අත්දැකීම් එයට බලපෑවේය. චීනයේ සහ රුසියාවේ රාජාණ්ඩු පිළිබඳව ජන විඥානය වෙනස් කෙරුණේ අතිශයින් දරුණු මර්දනයක් තුලිනි.

එහෙත් ලාංකිකයා කිසි දිනෙක රජෙකු එපා කිව්වේ නැත. ඔවුහු රජුන් යටතේ යම් පමණක වහල් - සුරක්ෂිතභාවයක් ඇතුව දිවි ගෙවීමට පුරුදුව සිටියහ. ඇමරිකාවේ වහලුන් පිළිබඳවද අප්‍රිකාවේ නොයෙකුත් ගෝත්‍ර පිළිබඳවද කල අධ්‍යයන වාර්තා පෙන්වා දෙන්නේ දීර්ඝ කාලයක් ඒකාධිපති ස්වරුපයේ පුද්ගලභාවයකට නතුවී සිටි ජන සමුහයක් එම ඒකාධිපති ක්‍රමයේ වද වින්දන වලට හුරුවෙමින් එයද සැපතක් බව විඥානගත කරගන්නා බවයි. ලංකාවේ උගත්-නූගත් වෙනසකින් තොරව මේ මනෝභාවය ජනගත වී ඇති බව පැහැදිලිව නිරීක්ෂණය කල හැක. 

ඇමරිකාවේ වහළුන් නිදහස් කරගැනීම සඳහා සටන් කල සමහර නායකයන්ට වහලුන් අතින්ම මිය යාමට සිදු වුනේ මේ නිසාය. මහාචාර්ය නලීන් ද සිල්වා, විමල් වීරවංශ වැනි අය ආමන්ත්‍රණය කලේ ලාංකිකයාගේ මේ සැඟවුණු මනෝභාවයටයි. ලංකාවට අත පොවන විදේශ බලවතුන් පවා මේ වන විට මේ ලාංකික සමුහ මානසිකත්වය හොඳින් හදාරා ඇති බව මම පෞද්ගලිකවම දනිමි. ඔවුන් තමන්ට වාසියක් ඇත්නම් නිරතුරුවම ඔබටත් නොදැනී මේ නිලය විටින් විට අල්ලනු ඇත.

ලංකාවේ මේ රාජාණ්ඩු ක්‍රමය වෙනස් කලේ සුද්දාගේ උවමනාවටය. එබැවින් තවමත් ලාංකිකයාගේ පෞද්ගලික විඥානය මෙන්ම සාමුහික ජන විඥානය තුලද රජෙක් නොමැතිවීමේ සාංකාව හොල්මන් කරයි. මේ නිසා ඔවුන් නැවතත් රාජපක්ෂ පන්නයේ පාලකයෙකු සෙවීම අතහරී යයි මම සිතන්නේ නැත. මෙය වැලක්වීමට නම් අති විශාල ප්‍රයත්නයක් දැරිය යුතුය. 

එහෙත් එය වැළක්විය යුතුද? මේ පැනයට ඔබම පිළිතුරු සොයා ගන්න. 


                 

Tuesday, 12 July 2022

මට පෙනෙන අනාගතය


සියල්ල එලෙසින්ම සිදුවෙමින් පවතී. කලක් මහා බලවතුන් ලෙස ජනතාව පෙළු අමනයෝ දැන් ජනතාවට බියේ තැනින් තැනට දිව යති. ඔවුන් කල වරදට ලොව කොතැනක සිටියත් දඬුවම් විඳිය යුතුය. ඒ ඔවුන් හා ඇති වෛරයක් නිසා නොව අනාගතයේ බිහිවන පාලකයන්ට ආදර්ශයක් ලෙසටයි.

මේ දිනවල ඇමරිකා-ඉන්දියා තානාපතිවරුන්ට උදාවී ඇත්තේ කාර්ය අධික සමයකි. ලොවට රහසක් වුවාට, යම් දේශපාලන නායකත්ව විභවයක් ඇති සෑම දෙනෙකුටම මේ වන විට ජූලි පෞද්ගලිකව කතා කර ඇතැයි ආරංචි වෙයි. දැන් සියලු දෙනාම ජූලි විසින් දැනුවත් කර ඇති පරිදි තම තමන්ගේ කාර්ය භාරය කුමක්දැයි වටහාගෙන ඇතැයි සිතමි. මේ වන විට නායකයාව තෝරාගෙන ඇති බව සැලයි. එසේම රාජපක්ෂලාට විය යුත්තේ කුමක්ද යන්නත් ජූලි විසින්ම තීරණය කරනු ඇත.

ඇමරිකාව අපට දීමට යන සමාජ-ආර්ථික-දේශපාලන මොඩලය කුමක්දැයි මට තවම නොවැටහේ. නමුත් එය රටේ ජනතාවට සෙමෙන් සෙමෙන් යහපත් තත්වයක් උදා කරනු ඇත. ඒ සඳහා අප ගෙවිය යුතු ගාස්තුව පිළිබඳවද අනාගතයේදී සෙමෙන් සෙමෙන් වැටහෙනු ඇත. ඒ කෙසේ නමුත් මා කලින් කීවා සේ ඔබගේ අර "උතුම්ම - නිර්මලම- පාරිශුද්ධම" අරවද මේවද ටික නම් අකුළා ඉන්දියන් සාගරයට වීසි කිරීමට අනිවාර්යෙන්ම සිදු වනු ඇත.