Tuesday 2 November 2021

හෝරාවේ තේමාව -1: වෙනසක් සොයන ඔබට


මේ වන විට ලංකාව නිදහසින් පසු ඇතිවී තිබෙන දරුණුතම ආර්ථික කඩා වැටීම හමුවේ සිටින බව වටහා ගත් කුලකය දිනෙන් දින ඉහල යනු පෙනෙයි. ඔබ මේ කුලකයට අයත් නැති නම් එහි වරදක් නැත. රටක සියලු දෙනාටම එකම මට්ටමක දැනුම් සම්භාරයක්, විශ්ලේෂණ ශක්තියක් සහ මානසික අවස්ථිතියක් නැත. මේ නිසා එකිනෙකා දකින දේ වෙනස්ය. මේ කෙටි සටහන් පෙළ ලියවෙන්නේ මා ඉහත සඳහන් කල කුලකය වෙතටයි.

අදට වඩා දරුණු සාමාජීය කඩා වැටීම් (sociatal collapses) සිදුවූ අවදි කිහිපයක් ලංකාවේ ජිවත් වූ කාලය තුල මා පසු කර ඇත. නමුත් ඒ සෑම අවස්ථාවකම ආර්ථිකය යම් පමණකට සවිමත්ව තිබුණි.

මේ ඇතිවී ඇති ආර්ථික අවපාතය සමග සාමාජීය බිඳ වැටිමක්ද සිදුවුව හොත් එය වෙනත් රටවල පුරවැසියන් නොවන සියලු දෙනාගේ ඉතා අභාග්‍යමත් කාලයක් වනු ඇත. සාමාජීය ව්‍යසනයකට හේතු වන්නේ රටක සිවිල් නීති පද්ධතිය බිඳ වැටීමයි. එය සමාජයෙන් මතුවන නැවැත්විය නොහැකි සොරකම් සහ මංකොල්ලකෑම්, අසීමිත මත් ද්‍රව්‍ය ව්‍යාප්තිය, පොලිසියේ රැකවරණය මහජනතාවට අහිමි වීම, ජාතිවාදී අරඟල, ත්‍රස්තවාදී ක්‍රියා ආදී වශයෙන් හිස එසවිය හැක.

රටක ආර්ථිකය යම් සීමාවකට වඩා පහලට ගිය විට ජනතාවගේ ක්‍රෝධය, වෛරය සහ විරෝධය කෙලින්ම එල්ල වෙන්නේ පාලකයා වෙතටය. මෙය ඔවුන්ගේ අවසානය විය හැක. නමුත් මේ අවසානය යම් කාලයකට කල් දමාගත හැකි අවසාන තුරුම්පුව පාලකයා විසින්ම සිවිල් සමාජය බිඳ වැට්ටවීමයි. එවිට ඔවුන්ට පවතින නීති රාමුවෙන් පරිබාහිරව මර්ධන යාන්ත්‍රණයක් ක්‍රියාත්මක කල හැක. මේ තත්වය අප අප්‍රිකාවේ සහ ලතින් ඇමරිකාවේ රාජ්‍යයන් කිහිපයකම දැක ඇත. එවන් තත්වයකට ලංකාව ඉතා ආසන්නයෙන් පවතින බව මට ඉවෙන් මෙන් දැනෙයි.

කල්පනාකාරී වන්න. පැහැදිලි වෙනසකට ජන විඥානය යොමුවෙමින් පවතින මේ අවස්ථාවේ එය වෙනතකට යොමු කළ හැකි අවස්ථාවාදී උපක්‍රම වල ගොදුරක් නොවන්න.


No comments:

Post a Comment