මගේ සීයා (මවගේ පියා) පොලිසියේ සාමාන්‍ය නිලධාරියෙක් ලෙස වසර 35 කට වඩා සේවය කර විශ්‍රාම ගියේය. නමුත් දෙහිවල සහ පිළියන්දල යන ඔහු ජිවිතයේ සැන්දෑ සමය ගතකල ප්‍රදේශවල බොහෝ දෙනෙක් ඔහු හඳුනාගෙන සිටියේ පියසිංහ වෙද මහතා ලෙසයි. ඒ ඔහු වැඩිහිටි ජීවිතය පුරාවටම තම පරම්පරාවෙන් රැගෙන ආ එමෙන්ම ඔහු විසින් නොයෙකුත් පොත්පත් කියවා සොයාගත් වෙදකම් ප්‍රදේශයේ අවශ්‍ය ඕනෑම අයෙකුට නොමිලේ ලබා දීම නිසාය. මගේ ජිවිතයේ කුඩා කල බොහෝ සති අන්ත ගෙවුනේ ඔහුගේ කටයුතු වලට බෙහෙත් සෙවීම, බෙහෙත් කෙටිම ආදිය වෙනුවෙනි.
සීයාගේ බෙහෙත් කිසිම බටහිර විද්‍යාත්මක ක්‍රමයකට තහවුරු කර නැති බව නම් මම දනිමි. එහෙත් ඔහුව සොයාගෙන පැමිණි රෝගීන් ඔහුගේ වෙදකම පිළිබඳව දැඩි විශ්වාසයකින් යුක්ත විය. ඊට හේතුව කුමක්ද?
පියසිංහ වෙද මහතා (සමහරු ඔහුව හැඳින්වුයේ පියසිංහ රාළහාමි කියාය) උපදින්නේ කඩිගමුව ප්‍රදේශයේය. ඒ 1898 දීය. නමුත් ඔහු තම ගම ලෙස සැලකුවේ රඹුක්කන ප්‍රදේශයයි. තවමත් එහි අපගේ නෑදෑයෝ සිටිති. ඔහු පොලිසියට බැඳුනු පසු ලංකාවේ ප්‍රදේශ ගණනාවක සේවය කර ඇත. ඒ සෑම ප්‍රදේශයකදීම ඔහු තමන් දන්නා පාරම්පාරිකව ලබාගත් සහ පසුව ඊට එකතු කරගත් දැනුම ආශ්‍රයෙන් ප්‍රදේශයේ ජනතාවට සේවය සලසා ඇත. මේ නිසා පියසිංහ රාළහාමි මීගහතැන්න පොලිසියෙන් පිළියන්දල පොලිසියට මාරු වූ විට (උදාහරණයක් ලෙස) මීගහතැන්නේ මිනිසුන් ඔහුව සොයාගෙන පිළියන්දලට පැමිණි බව මගේ මව පවසයි. මේ ආකාරයට පිළියන්දල ජනතාවද ඔහුව වෙදෙක් ලෙස හඳුනාගෙන ඇත.
මේ කතාව මා කියන්න සිතුවේ මේ වන විට ලංකාවේ ඇතිවෙමින් පවතින ඉතා භයානක මනෝ භාවයක් සහ ඊට අනුපාන සපයන මහාචාර්ය නලින් ද සිල්වා මැතිතුමාගේ මා කවදත් ප්‍රශ්ණ කරන දැක්මක් හේතුවෙනි.
දේශීය වෙදකම ලංකාවට පමණක් නොව ලොව සෑම රටකටම පාහේ ආවේණික වූ කලාවකි. එය චීනය, ඉන්දියාව, මැදපෙරදිග ආදී ප්‍රදේශවල වසර 5000 කටත් එහා ගිය අදටත් ප්‍රයෝගිකව භාවිතා වන වෛද්‍ය විද්‍යාවකි. ඒ පිළබඳව මම පසුගිය ලිපියේ කරුණු ගෙනහැර දැක්වුයෙමි. මේ සෑම වෙදකමක්, ඖෂධයක්ම සියවස් හෝ සමහර විට සහශ්‍ර ගණනාවක් ජනතා පරීක්ෂණයට ලක්ව ප්‍රත්‍යක්ෂ වූ කාරණාය. අද අප දන්නා මෙම දේශීය ඖෂධ මෙන්ම ජනතා පර්යේෂණයේදී අසමත්ව භාවිතයෙන් ඉවත් වූ වෙදකම් සහ ඖෂධද ගණනාවක් පවතින්නට ඇත.
අපේ සීයාගේ වෙදකම මුලින්ම පටන්ගනිද්දී සේවාලාභීන්ගේ විශ්වාසය දිනාගැනීම සඳහා අනිවාර්යයෙන්ම පාරම්පාරිකව එම වෙදකම ලබා තිබූ ප්‍රත්‍යක්ෂ වීම උපයෝගී කරගන්නට ඇත (ඔහු නොදැනීම). ඉන්පසු දශක ගණනාවක් ඔහුගේ වෙදකම් ජනතාව විසින් ප්‍රත්‍යක්ෂ කරගැනීම නිසා ඔහු ජනතා පරීක්ෂණයෙන් සමත්වන්න ඇත. ජිවිතයේ අවසන් කාලයේ ඔහු වෙතට විශාල පිරිසක් වේදකම් කරගැනීම සඳහා පැමිණීමට මෙය හේතු වන්න ඇත.
මා කලින් ලිපියේ සඳහන් කල පරිදි මේ දේශීය හෝ ආයුර්වේද වෙදකම් සහ ඖෂධ වැඩි දියුණු වන්නේ ඉතා දීර්ඝ කාලයක් තුළදීය. එය ජනතා පරීක්ෂණය සඳහා භාජනයවී සමත් වීමටද ඒ සා විශාල කාල පරාසයක් අවශ්‍ය වේ. මානව ඉතිහාසය පුරාවටම පවතින විද්‍යාත්මක ක්‍රමවේදය මෙයයි. අවශ්‍ය නම් ඔබට එය දේශීය විද්‍යාත්මක ක්‍රමය ලෙස අර්ථ දක්වා ගත හැකිය.
මේ සහශ්‍ර-සියවස් කාල පරාස තුල විකාශනය වූ විද්‍යාව දශක-වසර වලට පරිවර්ථනය වන්නේ නවීන විද්‍යාව තුලයි. එය මීට සියවස් දෙක තුනකට පෙර සිදුවිය. අදටත් එම ක්‍රමවේදය තුල වුවද පර්යේෂණය, නිගමනය සහ ප්‍රත්‍යක්ෂය වසරකට වඩා අඩුකරගැනීම ඉතා අසීරු ඉලක්කයක් වී ඇත. මේ වන විට ලෝකයේ සොයාගෙන ඇති කෝවිඩ් එන්නත් සඳහා මෙම ක්‍රියාවලියට දැනටමත් වසරකට ආසන්න කාලයක් ගතවී ඇත. මෙහිදීද ගෝලීය ව්‍යසන තත්වය සලකා එම එන්නත ජනතාවට ලබා දීමට තීරණය කර ඇත්තේ නොමේරූ (premature) ක්‍රමවේදයක් තුල බව බොහෝ වෛද්‍යවරුන් පිළිගනී. හරිනම් එය තවත් වසරක්වත් සායනික පර්යේෂණ සඳහා භාජනය කලයුතු බව බොහෝ විද්‍යාර්ථයන්ගේ අදහසයි.
අපේ රටේ දැන් මතයක් ගොඩනැගෙමින් පවතින්නේ නවතම රෝගයක් ලෙස වසරකට පමණ පෙර මතුවූ කොවිඩ් රෝගයට ක්ෂණිකව පහළවන ඖෂධ ක්ෂණිකවම ලබා දියයුතු බවයි. මේ සඳහා නවීන විද්‍යාත්මක ක්‍රමවේදය අනුව පරීක්ෂණ පැවැත්වීමද, පෞරාණික විද්‍යාත්මක ක්‍රමවේදය වූ දීර්ඝ කාලයක් (සියවස් ගණනාවක්) ජනතා පරීක්ෂණයට ලක් කිරීමද ඔවුන් ප්‍රතික්ෂේප කරයි. මෙම ඖෂධයට මේ ක්‍රමවේද කිසිවක් අදාළ නොවන බව ඔවුන්ගේ අදහසයි.
මේ අනුව කිසිවෙකු උදෑසන නැගිට පෙරදා රාත්‍රියේ තමා අහවල් දෙවියාගෙන් අහවල් බෙහෙත අසාගත්තා යයි කී විට අප පිළිගත යුතුය. ධම්මික මහතා කාලි මෑණියන්ගෙන් ලබා ගත්තාය කියන බෙහෙත අපි පිලිගන්නවා නම් දැන් තවත් මහතෙක් රාවණාගේ පුස්කොල පොතකින් ලබා ගත්තාය කියන බෙහෙත්ද පිළිගත යුතුය. නුදුරේදී නොයෙකුත් දෙවිවරුන්, දෙවඟනන්, භූතයන්. ප්‍රේතයන්, ලබා දුන් බව හෝ තම අධ්‍යාත්මික බලයෙන් ලබා ගත් බව පවසමින් දිනපතා බෙහෙත් එලි දකිනු ඇත. ධම්මික මහතාගේ පැණිය ඔබ පිළිගන්නේ නම් ඒ කියන අනෙක් බෙහෙත් ඔබ නොපිලිගැනිමට හේතුවක් ඇත්දැයි මම විමසා සිටිමි.
මේ ඔබ සියළු දෙනා දායක වන්නේ දේශීය වෙදකම ගොඩගැනීමට නොව නොයෙකුත් වංචනික තෙල් බෙහෙත් වෙළෙන්දන්ට, හොර මගඩිකාර තක්කඩින්ට අනුග්‍රහය දැක්වීමටයි. මෙය බොහෝ කලක පටන් ලංකාවේ යම් ප්‍රමාණයකට සිදුවුවත් අද තරම් රාජ්‍ය සහ වියත් අනුග්‍රහය සහිතව එය කිසිදාක ඔලුව ඉස්සුවේ නැත. මෙය ඔබ සිතනවාට වඩා බරපතල තත්වයකි. මෙයින් සිදුවන්නේ දේශීය වෙදකම වලපල්ලට යාම අධි වේගී කිරීමයි.
මේ අප හසුවන්නේ දේශපාලන උගුලකට බව බොහෝ දෙනෙකුට නොතේරීම ජාතියේම අවාසනාවකි.
ආන්ඩුවට කරන්න තියෙන්නේ සෞඛ්‍ය වෙනුවෙන් මුදල් වැයකිරීම සහ බදු ගැනීම නවත්වලා ජනතාවට කැමති ප්‍රතිකාරයක් ගන්න නිදහස ලබා දීමයි.
ReplyDelete😢😢😢
ReplyDelete