මා දුටු ඔබ නුදුටු සිහිනය

"රනිල් ආවොත් සල්ලි දෙන්න රටවල් තුන හතරක් බලාගෙන ඉන්නවා". 

මේ සිහිනය බොඳවී යද්දී ඒ කතාව කිව්ව කට්ටියත් දැන් තම තමන්ගේ පෝස්ට් ඉවත් කරගනිමින් සිටිති. ඇති හැකි රාජ්‍යයන් ආධාර දෙන්නේ පුද්ගලයන්ට නොව මනාව සැකසු මාර්ග සිතියමකට බව ලංකාවේ සිටින උගතුන්ට පවා නොතේරීම අවාසනාවකි. 

මට රනිල් වික්‍රමසිංහ සමග පෞද්ගලික විරසකයක් නැත. නමුත් මේ අවස්ථාවේදී රටේ සුක්කානම ලබා දීමට තිබූ වැරදීම පුද්ගලයා ඔහු යයි මට සිතෙයි. රනිල් යනු දේශපාලන අනාගතයක් නැති මහල්ලෙකි. ඔහුගෙන් පසු එජාපයට කුමක් වුවත් ඔහුට වගක් නැති බව ඔහු මෙතෙක් සාධක සහිතව පෙන්වාදී ඇත. ඔහුට දේශපාලන භුමිය සඳහා අනුප්‍රප්තිකයෙකු නැත. මෙවන් පුද්ගලයෙක් අවශ්‍යවන්නේ රටක් ඉහල ගියරයක ගමන් කරන විටයි. රීම් එකෙන් යන රටක් මෙවන් අයෙකුට ලැබුණු විට ඔහු කරන්නේ තමන්ගේ හිසේ මෙතෙක් තිබූ නොයෙකුත් fancy අදහස් අත්හදා බැලීමයි. මේවා අසාර්ථක වුවහොත් "ඔන්න ඔහේ තමුසෙලාම කරගන්නවා" යයි පවසා පැත්තකට වීමට ඔහුට කිසිඳු පැකිලීමක් තිබිය නොහැක. එවිට රට ගොඩ ගත නොහැකි තරම් විනාශ වී තිබෙනු ඇත. රනිල්ට අගමැතිකම යාම පිළිබඳව පාර්ලිමේන්තුවේ සිටින කිසිම පාර්ශවයකට අත සෝදාගැනීමට නොහැකිය. සියල්ලෝම පවට කරගැසිය යුතුය.

මා දුටු බියකරු සිහිනය සැබෑ වෙමින් පවතී. රටේ ඉතා දරුණු භාණ්ඩ අහේනියක් ඇති විටෙක වැටුප් ගෙවීම සඳහා මුදල් අච්චු ගැසීමත් සමගම අති-උද්ධමනයක් ඇතිවීම වැළක්විය නොහැක. දැන් මෙය නොකර බැරි දෙයක් වී ඇත. අති-උද්ධමනය බොහෝ විට ප්‍රජාතන්ත්‍රවාදයේ සහ සමස්ත සමාජ සංස්ථාවේ බිඳ වැටීමකට මග පාදනු ඇත. ඊළඟ තෙමස තුල ලාංකික ජනවිඥානය උඩු-යටි කුරු විය හැක.

දැනට මා දකින එකම ඉතා කෙටි කාලින විසඳුම නම් දේශපාලනයෙන් නොකිලිටි වූ අන්තර්ජාතික සම්බන්ධතා ඇති කමිටුවක් පත්කර ඔවුන් හරහා පෞද්ගලික පරිත්‍යාගශීලීන්ගෙන් ආධාර ලබා ගැනීමයි. මැදපෙරදිග, ජපානය, කොරියාව, ඇමරිකාව, කැනඩාව, මැලේසියාව, ඉන්දියාව, ආදී රටවල මෙන්ම යුරෝපයේද මෙබඳු පරිත්‍යාගශීලින් ඇත. නමුත් මේ පුද්ගලයන් හෝ ආයතන කරා ළඟාවීමට සියළු දෙනා අතර සාමුහික එකඟතාවයක් තිබිය යුතුය. ආගම්-ජාති වාද වලින් ඔළු පුරවාගත් උද්දච්ච ජන සමුහයකට සිඟමන් යැදිය නොහැක.