Sunday 2 August 2015

ජාතිය අනතුරේ




මට මේ කථාව ලියා එව්වේ කුරුණෑගල මැල්සිරිපුර ප්‍රදේශයේ පදිංචි පාසැල් ගුරු සේවයේද නියුතු ස්වාමින්වහන්සේ නමකි.

පවුල් 350 ක් පමණ පදිංචි මෙම ගමේ සිංහල බෞද්ධ ජාති මාමකත්වයෙන් ඔද වැඩුණු 250 ක පමණ පිරිසක් සිටියේය. සිංහල ජාතියටත් බෞද්ධ ජනතාවටත් මුස්ලිම් ආගමිකයන්ගෙන් එල්ලවිය හැකි තර්ජන පිළිබඳවත්, රණවිරුවන්ට අනාගතයේ සිදුවිය හැකි අසාධාරණකම් පිළිබඳවත්, විදේශ කුමන්ත්‍රණ මගින් සිංහළ ජාතිය රටෙන් තුරන් වී යාමේ අවධානම පිළිබඳවත් ඔවුන් බලවත් සේ කම්පා විය. සිංහල බෞද්ධ විරෝධී බලවේගයන්ට එරෙහිව ඔවුහු රැළි, උද්ඝෝෂණ, පා ගමන්, විරෝධතා පෙළපාලි මෙන්ම යම් අවස්ථාවල කලහකාරී ප්‍රතිරෝධතාද සංවිධානය කළහ. 

ගමේ පන්සලෙන් මේ කටයුතු වලට එතරම් සහයෝගයක් නොලැබීම මේ පිරිසගේ අමනාපයට හේතුවිය. ක්‍රමයෙන් වැඩි දියුණු වූ මේ නොසංසිඳීයාව පන්සලට දානය දීම වර්ජනය කරන ලෙස ඉල්ලා උද්ඝෝෂණ කිරීම දක්වා දියුණු විය.

ඇතිවන තත්වයේ බරපතළකම වටහා ගත් නායක හාමුදුරුවෝ දිනක් අනාරාධනයෙන්ම මෙම පිරිස පැවැත්වූ "රට බේරාගත් රණ විරුවන් රැකගනිමු" යන තේමාව යටතේ වූ රැස්වීමක වේදිකාවට ගොඩ වුහ. පන්සලේ නායක හාමුදුරුවන් වූ බැවින් කිසිවෙකුටත් එතුමාට එරෙහිව යමක් පැවසීමට නොහැකිවිය. 

කෙලින්ම මයික්‍රෆෝනය වෙත ගිය ස්වාමීන්වහන්සේ ගැඹුරු හඬින් තම කථාව ඇරඹීය. පැමිණ සිටි සියල්ලන්ම මවිත කරමින් එතුමා එම රැස්වීම සංවිධානය කල සහ ඊට සහභාගී වන පිරිස අගයන්න විය. එම සත් කාර්‍යයට උර දෙන හැම දෙනාටම තෙරුවන් සරණ පැතීය.

"මේ උතුම් වූ ක්‍රියාවලිය අපි කතා බහෙන්, පා ගමනින්, ඔබ්බට ගෙනියන්න දැන් නියම කාලයයි. මේ ගමේ ඉන්නවා යුද බිමට ගිහින් විරෝධාර විදියට සටන් කරලා, අවසානයේ  අත පය අහිමි වුන සොල්දාදුවෝ අට දෙනෙක්. ඔබ හැම දෙනාම මේ අයව දන්නවා. ඔවුන්ගෙන් හත් දෙනෙකුගේම පවුල් අද ඉතාම අසරණ තත්වයට පත්වෙලා තිබෙන්නේ. ඔවුන් කෑම කන්නේ වේලක් හැර වේලක්. මේ නිසා මම යෝජනා කරනවා මෙතන සිටින සියළු දෙනාටම මසකට රුපියල් 800 ක මුදලක් මෙම පවුල් වෙනුවෙන් පරිත්‍යාග කරන්න කියල. මම හොඳාකාරවම දන්නවා මේ පිරිස මේ උතුම් කාර්යයට ඉතා ප්‍රීතියෙන් සහභාගී වන බව".

හාමුදුරුවෝ තම අතේ වූ ලොකු අභ්‍යාස පොතක් පෙන්වමින් "මම මේ පොතේ රූල් ගහල පිළිවෙලට තියෙනවා ඔබලාගේ නම් සහ ලිපිනය ලියන්න. එහි අංක එකට ඇත්තේ මගේ නමයි. අංක දෙකට ඇත්තේ අපේ ගුරු හාමුදුරුවන්ගේ නමයි (මට ලිපිය එවූ ස්වාමින්වහන්සේ). පන්සලෙන් මේ සත් කටයුත්තට රුපියල් 1600 ලැබෙනවා. දැන් ඔබතුමන්ලා එක එක්කෙනා ඇවිත් නම, ලිපිනය සහ ටෙලිෆෝන් අංකය ලියා යන්න. මාසේ අන්තිමට ගම වටේට ඇවිදලා මුදල් එකතු කරන කාර්ය මම භාර ගන්නම්. සියලුම මුදල් නිවැරදි පිළිවෙලට ගිණුම් ගත කරන්නම්".

හාමුදුරුවෝ කථාව අවසන් කොට ඒ මේ අත ඇඹරෙමින් වේදිකාවේ සිටි ප්‍රධාන සංවිධායක දේපල වෙත ගොස් අතෙහි තිබු පොත පිරිනැමුවෝය. 

"හාමුදුරුවනේ මම මේක ගැන පොඩ්ඩක් හාමිනේගෙනුත් අහලම ලියන්නම්" ප්‍රධාන සංවිධායක ගොත ගසන්න විය.

"එහෙමයි හාමුදුරුවනේ, මමත් මේ වැඩේට නම් කැමතියි, ඒත් ඉතින් ගෙදරිනුත් අහලම පන්සල පැත්තේ එන්නම්කෝ" මේ අනෙත් සංවිධායකයාය.

"හා හොදයි උපාසක මහත්තයෝ.." ස්වාමින්වහන්සේ සභාව දෙසට හැරෙන විට අන්තිම ජාති මාමකයාද පිට්ටනියෙන් පිට වෙනු දක්නට ලැබුණි. 

මේ එතැන් පටන් තුන් වන මාසයයි. ජාති මාමකයන්ගෙන් "හුම්" සද්දයක් නැත. පන්සලේ දානේ වේලද නොවැරදීම ලැබේ. 

*************

අද වතපොත පුරා ජාතිමාමක පොස්ට් පළකරන, කොමෙන්ටු කොටන කී දෙනෙක් සිංහල බෞද්ධ ජනතාව රැක ගැනීම සඳහා මාසික මුදල් ආධාරයක් කරන්න යැයි කීවොත් ඊට සහභාගී වෙයිද? 

ජාති මාමකයෝ 99% ම වතපොත හැර යනු ඇත.




1 comment:

  1. සිංහල ජාතිය රැකගන්න වැඩි වැඩියෙන් පැටව් ගහන්න කියලා පහුගිය ටිකේ සෑහෙන කෑගැහීමක් කලා මේ කට්ටියම. ජාතිය රැකගන්න කියලා මේ ලෝකෙට ගේන දුප්පත් පවුල් වල ළමයින්ට ඔය විදියෙ ආධාරයක් කරන්න කිව්වා නම් එතනදිත් වෙන්නේ චන්දිම මේ පෝස්ට් එකෙන් කියල තියෙන කතාවමයි.

    ReplyDelete